Ka party NPP ka kut jingmut skhem ban wanrah shuh shuh ia ki ain ban iada ia ki trai muluk: Prestone

Syllad | The Rising MeghalayaFebruary 15, 2025

U President ka National People’s Party (NPP) ka Meghalaya bad Symbud Myntri Rangbah ka Jylla u Bah Prestone Tynsong u la ong ba ka party jong u ka kut jingmut skhem ban wanrah shuh shuh ia ki ain kiba treikam na ka bynta ban iada ia ki trai ri trai muluk.

Haba aijingkren ha ka jingialap elekshon ban pan jingkyrshan ia u MDC ba mynta ka Mairang u Bah Batskhem Ryntathiang haka 14 tarik Rymphang, u Bah Prestone u la ong ba ka NPP ka ka kut jingmut ban khmih bniah halor kine ki mat bad na ka bynta ka bha ka miat jong ki trai ri trai muluk.

Haba ai khublei ia ki paid Khasi bad Jaintia halor ka rai kaba ki la ai ia ka party ban ialam ia ka KHADC bad JHADC, u bah Tynsong u la pynthikna da kaba ong, “Ngin bteng ban wanrah shuh shuh ia ki ain kiba treikam na ka bynta ban iada ia ka bha ka miat bad ki jingmyntoi jong ki paidbah da kaba iatreilang bad ki Dorbar Shnong.

U la ong ruh ba ka KHADC ka la pynlong ia ka prokram ha kaba u Lat ka Jylla u la sam ia ki syrnot sha ki Rangbah Kur ban pynpaw ba ki dei kiba la shah pynkupbor katkum ka ain ba la mynjur da ka Council.

Nalor kata u la ong ruh ba ka jingai jingithuh ia ki Seng Longkmie bad Seng Samla ha ki shnong ki thaw da ka ain ruh ka dei kawei na ki jingkyrkhu kaba khraw nalor ka Khasi Lineage Act, kaba la ai jingithuh ia ki Kur bapher bapher ha Rilum Khasi.

Ha kaba iadei bad ka Lineage Act, u Bah Prestone u la ong ka dei ka ain kaba kongsan bha na ka bynta ki trai ri trai muluk. “Nga kyntu ia ki paidbah ba kin ai ka jingkyrshan kaba pura ia ka NPP bad ban vote ia u kyrtong jong ka u Bah Batskhem Ryntathiang khnang ba un lah ban ai ka jingshakri kaba kham bha shuh shuh ia ki paidbah jong ka Mairang constituency. Lada un shah jied biang un sa iakren bad ka sorkar halor kiba bun ki mat bad ki jingeh kiba ki paidbah bad ka constituency ki iakynduh,” u la bynrap.

Haba pynpaw ba ki paidbah barabor kin kwah ia ka jingkylla ha man la ki elekshon, u Bah Prestone u la ong, “Phi la iohi ba ka NPP ka la lah ban wanrah ia ki jingkylla kiba donkam. Ngi la thaw ia kane ka District kaba thymmai, ka Eastern West Khasi Hills da kaba pynshong nongrim ia ka jingangnud ba la slem bah jong ki paidbah ka thain.Mano ba leh ia kata lada ym dei ka party jong ngi.Kumta, balei ba ngin dang don daw ban ong ba ka NPP kam dei ka party kaba bha lane ka NPP ka dei ka party Garo. Lada ki paidbah ki ong ia kane, kumta uwei u Prestone? Nga dei u president ka party ha ka jylla.”

Haba kynthoh tyngeh ia kito kiba pyrshang ban ialam bakla ia ki paidbah da kaba kynnoh ba ka NPP ka dei ka BJP, u Symbud Myntri Rangbah u la ong, “Shah ngan ong haphi, ia ka NPP la thaw da u nongialam ba radbah ka Jylla u (L) PA Sangma uba dei ruh u Lamphang barim ka Lok Sabha na ka thain. Ka riti treikam jong ka NPP ka long ban aijingiada ia ki paid riewlum ym tang ha Meghalaya hynrei ha baroh kawei ka thain Shatei Lammihngi. Ki briew na kylleng ka ri ki la wan ban ai ka jingkyrshan halor ka jingthaw ia ka NPP. U nongialam na Uttarakhand u la wan iakynduh ia ngi bad pynpaw ia ka jingkwah ban thaw ia ka NPP ha ka jylla jong u na ka bynta ban iada ia ki trai shnong rit paid. Sngewbha wat pyrkhat ia ka NPP kum ka nongwei.”

Shuh shuh haba kyntu ia ki paidbah ba kim dei ban shah ialam bakla ha ki party liang pyrshah kiba heh tang ka tyngam, u bah Prestone u pyntip ba ka sorkar ka la pyntreikam ia kiba bun jait ki skhim ban weng ia ki jingeh ha ka liang ka ioh kam ioh jam hapdeng ki samla trai shnong bad ong, “Sngewbha wad ia ki jingtip kiba donkam na ki ophis BDO.”