Ka Phali Ka Ïuspong

C. Pynsakhiat Yeini KyndiahJuly 12, 2020

Ka Phali ka ïuspong wa em I dor ïong ka,
Wow pynkup ïei maiñ I kun u Kñi u Pa.
Laha ka dorbar sorbar ha khim nae ha lait,
Ïoo phnger kiwa bichar kiwa peit.

I burom wakhroo ïong u Kñi u Pa,
Wow sai ïow thylliej wa em ka ñia.
Ka Phali Ka ïuspong toh kawa khia,
Wow koob ïei kyrdan u Kñi u Pa.

La ha ka dorbar sorbar u ïa chong,
Wymïe u e thylliej khlem ka Phali ka ïuspong.
Nadooh narim wa sikai ka Dustur,
Ka Phali ka ïuspong wa em I dor I mur.

Ini I wymtoh iwa dang thymme,
Iwa dadep pynchong nongrim nadooh nynde.
Lada ha ki kaam ka niam chongkha,
Em ka hukum wow spong u Kñi u Pa.

Ki khor ki khriam kiwa em I rong,
Kini sakhiat kitae ki ïuspong.
Tre-kirot me hi wow wai ka luti,
Ïoh u biang lut waroh ki Kñi.