Ka Police Out Post ha Barato Fire Service ha Raliang bad 3 klur ka surok shnong ha Mowkaiaw pynbna u Conrad

Syllad | The Rising MeghalayaAugust 23, 2022

Ka jingangnud jong ki paidbah ka thain Barato –Mukhroh kaba hap hapoh ka Mowkaiaw Constituency mynta ka kynti ka lah ban urlong noh ban ioh iaka Police Outpost ha Shnong Barato na bynta ban wanrah ia ka jingshong suk shongshngain bad ban tem iaka jingshah pyndik haka briew sorkar jong ka Assam da ka jingpynbna paidbah jong u Myntri Rangbah jong ka Jylla u Conrad K Sangma.

U Sangma u la iathuh ia kane ha ka jingialang paidbah haka sngi Nyngkong bala pynlong da ka NPP West Jaintia Hills District ha Madan Khmut Wasain, Mowkaiaw ban pynbna ia u Habahun Dkhar kum u kyrtong NPP na Mowkaiaw haka elskshon MLA 2023.

U la iathuh ba ka Sorkar ha ka jingialam jong da kaba shimkhia ia ka khia ka shon jong ki paidbah ka la rai ban buh noh ia ka Police Outpost ha Shnong Barato bad ka file halor kane ka kam ka dang iai sha ka tnat Planning bad hapoh shi bnai eiei kin sa wan buh mawnongrim ban tei ia katei ka Police Outpost ha Barato.

Shuh shuh u Myntri Rangbah ula ong ba ha kajuh ka sngi kin buh ia u mawnongrim ban tei noh shen ia ka Fire & Emergency Service Station ne ka ophis jong ka tnat pynlip ding ha Raliang.

U Sangma u la pynbna ruh ba la mang lai klur tyngka ban shna ia ki surok hapoh shnong Mowkaiaw.

U Myntri Rangbah ula iathuh ba ia ka Surok na Raliang sha Sahsniang shen yn sa shna shen noh lyngba ka Skim PMGSY bad u la ong ruh ba ka sorkar ka la dep shna ia ka surok na Pasyih sha Saphai (Garampani) ha ka jinglut ba 65 klur tyngka. 

Haba phai sha ka skim PMGSY, u Sangma u la iathuh ba ia ka Jylla Meghalaya la shah kyntait ban ioh iaka skim PMGSY namar ka jingbym lah ban pyntreikam bha jong ki sorkar kiba rim. Hynrei hadien ba u la shimti ia ka Sorkar u la shimkhia halor kane kam ban iakren bad ka sorkar pdeng ban pynioh biang ia ka bhah jong ka Meghalaya na ka skim PMGSY bad ha kine ki saw snem bala leit ka jingpyntreikam jong ka skim PMGSY ka haduh san shah ia ki 15 snem kiba la leit.

U Myntri Rangbah u la iathuh ba bun ki seng sain hima sima ki la kynthoh ia ka Sorkar MDA hadien ba shah khang ka jingshalan mawshun sha Bangladesh na Meghalaya da ka High Court jong ka jylla hynrei u la khlem shong kli kti ba u leit iakynduh ia ki heh ka tnat Commerce bad tnat Mining sha Delhi bunsien bad mynta la shah biang ban shalan mawshun sha Bangladesh.

Kiwei kiwei kren haka jingialang ki kynthup ia u Comingone Ymbon MLA ka Raiang Constituency, u Wailadmiki Shylla MLA ka Jowai Constituency, u CEM ka JHADC u Thombor Shiwat, u Banjop Pyngrope MDC nalor kiwei kiwei haka jingiadonlang u paid nongkyrshan ka NPP uba la wan na kylleng ki shnong.