Ka por kala dei ban pynkylla ‘Smart Town’ iaka Jowai: Wailadmiki Shylla

Syllad | The Rising MeghalayaJuly 24, 2020

U Ma Wailadmiki Shylla ula ong “Ka por kala dei ban pynkylla iaka Jowai kum ka ‘Smart Town’ bad kane kan urlong tang lada ka sorkar ka kloi ban theh ki lad pynroi na ka bynta ka jingbha bad ka jingmyntoi ka Jowai baroh kawei.”

U Ma Wailadmiki Shylla ula iakynduh ia u Myntri Rangbah ka Jylla, Conrad K Sangma hynne ka sngi bad ula ai da ka dorkhat halor ka jingshah iehbein ka Jowai haki kam pynroi.

Katkum ka dorkhat U MLA, ula ong ba ka Jowai kam shym la ioh satia kino kino ki kam pynroi la bun bun snem.

Kine ki kam pynroi bad ki kam tei jingtei kiba ka Jowai kam shym la ioh satia ki kynthup ruh iaka surok.

U MLA ula ong ba ka surok ha Jowai kam pat biang satia bad ka dei kaba khohruh khohram bad jot rathai. Nalor kata ym don satia ki nala bad ki lynti iaid paidbah ne foothpath kiba biang.

Ka Jowai kam don jaka ieng kali ba paka bad ki painkhana paidbah ha ki jaka iew.

U MLA ula ong shuh shuh ba kam tei jingtei ruh kaba ym shym la khmih bha da ki bor ba dei peit bad la bun ki kam tei jingtei ha ki rud surok kaba wanrah iaka aksident bad kiwei kiwei ki jingjia ba sngewsih.

Shuh shuh ula ong ba ka Jowai kam don wat ki street light, ki CCTV ban shngain ka leit ka wan u paidbah.

Ka Jowai kam don satia ka jaka bret ñiut kaba paka bad la lap ba ki paidbah ki bret iaki ñiut kat sha ba lap bashem.

Ki surok kiba la tei la shna khlem ki plan kiba biang kaba wanrah jingeh haba jia ki kam ba kyrkieh naba ki surok ki sahkut bad kim dei satia kiba lait ne kaba pyniasoh na kawei sha kawei pat.

Baroh ki ophis sorkar ki dei ban biang iaki tiar ki tar kiba dei bad ka juk mynta ban pynsuk iaka jingshakri sha u paidbah.