Ka por kala dei eh ban sam iaki buit ha skul, ong u Lahkmen haba plie iaka golden jubilee ka Nongtalang Govt Secondary School

Syllad | The Rising MeghalayaSeptember 27, 2024

U Ma Lahkmen Rymbui, u MLA Amlarem bad Chief Adviser ka Sorkar Jylla ula ong “Ka por kala dei eh ban sdang iaka jingsam iaki buit bad ki sap ki phong ha ki khynnah skul khnang ba kin lah ban ieng hala ki jong ki kjat.”

Ula ong ia kane haba kren kum u kongsan haba plie iaka jingrakhe ia u mawmer ba 50 snem ka jingiaid lynti ka Nongtalang Government Secondary School haka 26 tarik Nailur.

Haba kren shuh shuh ula ong ba ka pule ka puthi mynta kam dei shuh tang ban shu sngap iaka jinghikai ki nonghikai bad ban kynmaw lyndet ia kaei kaba la hikai ban ioh ki marks kiba heh, hynrei kaba kongsan mynta ka dei ban sam iaki buit (transferring of skills).

Kane ka kynthup iaki nonghikai bad ki khynnah skul ha kaba ki nonghikai ki dei ban sngewthuh kumno ban iakren ban sam iaki buit sha u khynnah, kumjuh ki khynnah skul ki dei ban sam mar kylliang iaki sap ki phong bad ki buit jong ki para khynnah ia kaei kaba ki nang bad tbit kaba lah ban pyndonkam ha kino kino ki kam.

“Wat iaki khynnah skul klas 9-10 dei ban ialam iaki sha kad khaii Land Port Dawki ba kin ioh lad ban iohi dala ki jong ki khmat, ioh don napdeng jong ki kiba don iaka sap ban long ki nongkhaii bar ri ne ki nongseng kam,” ong u Lahkmen bad bynrap ba ka sorkar mynta kala pynshlur iaka jingpule STEM ne ka Science, technology, engineering, bad mathematics ban sngewthuh bad sei iaka sap ka phong bad ban iar ka jingmut jingpyrkhat ban tip bniah iaka sawdong sawkun ka pyrthei. Nalor ka Learning Club ha skul ban iarap iaki khynnah skul haka pule ka puthi bad ban iasyllok bad ban iasam buit iarap haka pule puthi jong ki.

U MLA ka thain Bah Lahkmen Rymbui ula long kum u kongsan ban pynher iaka lama kum ka dak ka jingsdang jong ka jingrakhe haka jingdonlang ka District School Education Officer, West Jaintia Hills District ka Kong Almo. P Syiem, Bah Holando Lamin MDC ka thain, ki nongialam shnong naduh ki waheh shnong, Secretary Shnong, ki riew rangbah ka shnong kumjuh ki nonghikai, ki khynnah skul, ki kmie ki kpa nalor kiwei kiwei.

La pynphuh pynphieng ia kane ka jingrakhe da ki jingshad bad jingrwai ba la shim bynta da ki khynnah jong kane ka skul.