Ka por plie dukan haki kynta Curfew ha East Khasi Hills

Syllad | The Rising MeghalayaMay 15, 2021

Ka District Magistor jong ka East Khasi Hills District, Kong Isawan Laloo kala pynjari iaka Curfew Coronavirus naduh ka 5:00 AM jong ka 17 tarik u Jymmang haduh 5:00 AM jong ka 24 Jymmang ban tem iaka jingpur ka khlam COVID-19.

Ia ka curfew la pynjari ktkum ka jingbthah jong ka Sorkar bad khnang ba ki paidbah nongshong shnong kin ioh ban thied ban pet ia ki jingdonkam ba man la ka sngi ha ka por ban pynjari ia ka kurphiw naduh 17 haduh 24 Jymmang hapoh East Khasi Hills District.

Tang ki dukan kiba die ia ki marbam mardih bad ia ki tiar ba donkam eh kiba la jingpynbeit da ki Incident Commander jong man la ki Zone kiba don hapoh Sor Shillong bad ki jaka ba marjan, kin lah ban plie naduh sngi Nyngkong haduh sngi Thohdieng, naduh ka por 9 baje mynstep haduh 5 baje janmiet, khnang ba ki paidbah nongshong shnong kin lah ban thied ban pet ia ki mar ba donkam eh.

Baroh ki dukan kin khang ha ka 22 bad 23 tarik u May, 2021 (Sngi Saitjain & Sngi U Blei).

Baroh ki shnong/dong ki la jied ia ki dukan ha la ki jong ki jong ki shnong/dong, bad ki bor shnong/ CCMT kin pyntikna ba ki paidbah nongshong shnong kim dei ban mih shabar na la ki jong ki shnong/ dong na ka bynta ban thied ia ki mar ba donkam ban lait na ka jingkhapngiah ne jingsaphriang shuhshuh jong u khniang jingpang.

Na ka bynta ki shnong kiba don ha ki thain nongkyndong jong ka District, ia kane kajuh ka jingpynbeit yn sa pyntreikam da ki Sub-Divisional Officer (Civil)/Block Development Officer/Incident Commander ha ryngkat ka jingiatreilang bad ki Rangbah Shnong bad ki CCMT.

Ki Rangbah Shnong, CCMT bad ki kynhun ba peit ia ka bha ka miat hapoh shnong poh thaw, kin pynbeit ia ka jingtreikam jong ki dukan ha la ki jong ki jong ki shnong/dong bad ruh ban pyntikna ba ki paidbah nongshong shnong kin bud ryntih ia ki jingbthah ba la pynmih da ka tnat ka Koit ka Khiah.

Ki paidbah ki dei ban bud pyrkhing ia kine ki kyndon harum haba ki leit thied leit pet:-

Lashah tang iwei i dkhot na kawei ka longiing ban mih ban leit thied jingthied.

Ban deng barabor ia ki mask

Ban pyniajngai iwei na iwei pat ym duna ia ka 1 mitar

Ban ym ia lum bun briew tang ha kawei ka jaka/dukan bad ruh ban ym pynjlan por palat hapoh dukan.

Ban iatrei lang bad ki jingpyniaid jong ki Rangbah Shnong/CCMT bad jong ki Incident Commander.

Lada lap ia kino kino ki ba mih khlem kano kano ka daw kaba biang, yn pynshitom kat kum ka ain.

Ia ki mar bam mar dih (Stock) ym don jingduna eiei bad kane ka Ophis ka la peitngor bha halor kane ka bynta. Ki dukan ba die ia ki mar bam mar dih kin bteng ban plie kumba la ju pynbeit na ka por sha ka por, te ki paidbah kim dei ban tieng ne mih shisien mih ha ki por ba plie.