Ka Prof Sherwin May Sungoh kum ka Pro Vice-Chancellor ka skulbah NEHU

Syllad | The Rising MeghalayaMarch 26, 2025

Ka Prof Sherwin May Sungoh ka la shah thung kum ka Pro Vice-Chancellor (PVC) jong ka skulbah North Eastern Hill University (NEHU) Shillong Campus.

Kane ka jingthungkam ka la long shibynta ban pyntreikam ia ka rai ba la shim da ka Executive Council (EC) ha ka Emergent Executive Council meeting kaba 85 kaba long ha ka 14 tarik Naiwieng, 2024.

Ka Prof Sungoh ka la shimti ia ka kam kum ka Pro Vice-Chancellor naduh ka 21 tarik Lber 2025 bad pyntip ia kane ka jingshimti sha u Vice Chancellor u Prof Prabha Shankar Shukla, ong u kyrwoh ba la pynmih da ka NEHU.

“Ka Prof SM Sungoh kaba dei ka professor ha ka Department of Education ha NEHU, Shillong Campus ka dei kaba la don ia ka jingshemphang kaba jylliew ha ki jingpule kiba kham shalor, ki jingwad bniah bad ka la noh synniang shibun ha ka jingroi jong ka pule puthi jong ka skulbah NEHU mynta la bun tylli ki snem, bad ka la don bynta shitrhem ha ki project wad bniah bapher bapher, ki jingpynmih kot bad ka jingkitkhlieh ban pyniaid ia ki kam jong kane ka skulbah. Ka jingtbit ka jong ka ha ka liang ka pule puthi kan aijingmyntoi shibun ia ka skulbah ha kane ka kam bathymmai jong ka,” ong u kyrwoh.