Ka pule puthi ka bynta ba kongsan ban kyntiew ia ka roi ka par ha baroh ki liang: Rakkam

Syllad | The Rising MeghalayaJune 14, 2024

U Myntri ka Tnat pule puthi ka sorkar Jylla u Rakkam A Sangma u la pyniaid ia ka jingialang iamir jingmut jong ka Meghalaya State Education Commission (MeSEC) ha ka 13 tarik Jylliew ha ka jingiadon lang ki Principal jong ki Secondary bad Higher Secondary school, College, ki seng nonghikai bad ki District School Education Officer ka Rilum Garo.  

Ha kane ka jingialang, u Myntri u la plie ia ka jingiamir jingmut da kaba kdew halor ka jingdonkam ban pynlong ia kaba kum kane ka jingialang khnang ban sngewthuh halor ki jingeh bapher bapher kiba iakynduh ha ka liang ka pule puthi hapoh ka thain bad khnang ban lah ban pynjanai bad ban ai jingmut sha ka sorkar khnang ba kan leh ia kaba donkam.

Da kaba kdew halor ki jingangnud jong u Myntri Rangbah ka Jylla u Conrad K Sangma, une u Myntri u la ong ba u Myntri Rangbah u don ia ka jingangnud ba ka Jylla Meghalaya kan long kawei napdeng ki 10 tylli ki Jylla kiba hakhliehduh hapoh ka ri ha ka liang ka pule puthi, bad bynrap ruh ba ka pule puthi ka dei kawei na ki mat ba kongsan ka bynta ban kyntiew ia ka roi ka par ha baroh ki liang, bad wei ba ka pule puthi ka iaid ha ka lynti kaba dei kiwei pat kin bud hi ha baroh ki bynta bad ka ban lam sha ka jingjop.

Ha kajuh ka por na ka liang u Myntri ula kyntu ruh ia ki Deputy Commissioner bad ki heh ophisar ka Tnad pule puthi ba kin leit jurip ia ki skul man la ka por khnang ban peit ia ka rukom treikam jong ki skul hala ki jong ki District.

Na ka liang ka Secretary jong ka Mothers Union bad ka nonghikai Sume B Sangma kaba pyniaid ia ka skul step na ka bynta ki nong bylla iing briew, kala pyntip ba ki nongwan skul ki dei kiba wan na kylleng ki jaka kyndong ka Rilum Garo bad pyntip ia ki jingeh ba iakynduh namar kiba bun ki nang satia ban pule ne ban thoh.

Nalor kata ka la pyntip ruh ba ha ka jingiakren bad kine ki nongwan skul, la lap ba kiba bun hi kila wan na ki skul ba don tang uwei ne kawei ka nonghikai u/ba shim haduh 5 tylli ki klas ha ka shisien shim.

Ha kane ka jingialang la ia don lang ruh u Nongaibuit ka Tnat pule puthi ka sorkar Jylla u  Bah Himalaya Shangpliang, Chairperson, MeSEC Professor SM Sungoh, Adviser bad Former UPSC Chairman, David R Syiemlieh,  Secretary, Education Department, Ambrose Ch Marak, Executive Chairman, Meghalaya Board of School Education, Tura C P Marak, Deputy Commissioner, West Garo Hills District Jagdish Chelani lem bad kiwei pat ki heh sorkar.