Ka pule puthi online: Shitom ki khynnah skul ha nongkyndong bym biang internet

Syllad | The Rising MeghalayaJune 29, 2021

Ka sorkar kala pyrshang har rukom ki lad ban sam jingnang jingstad lyngba ka internet ne online sha ki khynnah skul hadien bala wan lynsher ka khlam COVID-19  kaba la hap ban khang iaki skul, hynrei kane kam shym la poi pat sha ka thong namar ba duna palat ki signal ne ka internet sha ki thain nongkyndong.

Ka Khasi Students’ Union (KSU) Namdong Unit kala pynpaw ba kiba bun ki khynnah skul ha ka thain Namdong ki shem jingeh ban shong klas online namar ba tlot palat ka internet bad ki phone kiba pyndonkam ruh kim don signal satia.

Katei ka thain ka dei kaba la jingshakri tang da ka JIO hadien bala jah kiba bun ki company, pynban kane ruh kam lah satia ban ai ka jingshakri kaba pynhun ia u paidbah bad khlieh la ka sngi ki duh singal ki phone kaba buh jingeh ban shongklas online ki khynnah kumjuh ban phone na ka bynta kiwei kiwei ki kam, khamtam haba don ki kam ba kyrkieh.

Kane ka jingduh signal phone ka pyndiaw ia ki khynnah skul bad ki nongshong shnong baroh.

Ka KSU kala dawa naka sorkar bad naka company ban pynbiang ia ki jingshakri khnang ba ki paidbah bad ki khynnah skul kim nym shah ktah ha kum kane ka por ka saw sian ba wan lyngshop ka khlam.

Kane ka jingthud ki signal phone kam dei tang ha katei ka thain, hynrei ha kiba bun ki shnong ha West Jaintia Hills bad East Jaintia Hills District.