Ka rally khang bam doh masi kan pynthut iaka shongsuk shongsain: Metbah

Syllad | The Rising MeghalayaSeptember 24, 2024

U President ka United Democratic Party (UDP), u Bah Metbah Lyngdoh ha ka 23 tarik Nailur u la ong ba kano kano ka jingailad ia ka rally iada bad khang bam doh masi ha ka nongbah Shillong khlem pep kan pynthut ia ka shongsuk shongsain.

Ia kane u la pynpaw ha kaba iadei bad ka jingthmu jong ka seng Hindu ban pynlong ia ka Gau Dhwaj Sthapana Bharat Yatra ha ka 2 tarik u Risaw ha ka nongbah Shillong ban ialap halor ka jingdonkam ban ai ka jingiada kaba kyrpang ia ki masi bad ban khanglad ban shoh doh hapoh ka Ri India.

“Kam long kaba bha ia ki ban pynlong ia kum kine kiei kiei ki bym don jingmut bad ki ban shu wanrah pynban ka jingthut hapdeng ki paidbah,” ong u Bah Metbah haba kren sha ki lad pathai khubor.

Nalor kata, haba kyntu ia ka kynhun seng Hindu ban kiar ban mushlia ia ka jingngeit niam jong kiwei pat, une u nongialam ka UDP u la ong, “To ngin burom ia baroh ki jait jingngeit, phi lah ban leh ia la ki jingleh niam ki jong phi hynrei wat mushlia ia kiwei pat.”

Shuh shuh u la ong, “Hangne ha Meghalaya ngi don ruh shibun ki Hindu, ki Muslim bad ki jaidbynriew bapher bapher, ki pyndep ia la ki jong ki jingleh niam bapher bapher bad ngim ju pynthud ia ki bad kumta ka dei ban long kumjuh ia phi ruh. Ngi hap ban burom markylliang haba phai sha ki jingleh niam leh rukom.”