Ka RDA ka pyrshah iaka Hindutva Ideology, ong u Bah Robertjune haba pan jingkyrshan ha Khliehriat

Syllad | The Rising MeghalayaMarch 31, 2024

U kyrtong MP jong ka RDA, u Bah Robertjune Kharjarin ula ong ba ka mat kaba ki pyrshah ka long iaka Hindutva Ideology ha Jylla bad ha ri India hi baroh kawei.

“Ngi ieng haka nongrim ban pyrshah iaka jingpyrkhat Hindu bad ban pyrshah halor ka jingphah kren Hindi jubor, ngi ieng ban pyrshah iaka jingpynbor ban pdiang ia tang kawei ka niam bad ka jingkhang bam doh masi bad kiwei kiwei ki kyndon kiba ngim sngewiahap,” la ong u Bah Robertjune Kharjahrin haba kren haka jingialang pan jingkyrshan ban jied ia u kum u kyrtong MP ha Khliehriat haka sngi Saitjain.

Ula ong bynrap ruh ba “Ngi pyrshah iaka UCC kaba dei ka aiñ deiriti kaba thmu ban bujli iaki riti ki dustur bad iaki niam kiba kyrpang ki jong ngi, ngi ieng halor ka nongrim ban iada iaka hok mane Blei laitluid ha kylleng jong ka ri India.”

Haba kren shuh shuh ha kane ka jingialang ula ong ba kala dei ka por iaka rilum Khasi bad Jaintia ban bujli noh ia u MP na ka Shillong Parliamentary Constituency. “Nga burom ia u ma Vincent H Pala, hynrei haba phai haki jingthrang jingangnud jong ka Constituency ka la donkam ban bujli noh ymdei tang ia u MP wat iaka Party ruh.”

Ula kyntu iaki paidbah ba haka 19 tarik Iaiong u bnai ban wan kin leit shaka jaka thep vote bad nion iaka budam jong ka bom (UDP) bad pynjop ia u ban long kum u MP khnang ban un ioh ban iasaid iaka eh ka shon ka Jylla.

Kiwei kiwei ki mat kiba u kren kadei halor ka kam tih dewiong, ka rukom bat khyndew shyiap bad pynkhlain iaki District Council, ka jingpynkylla iaka Sixth Schedule bad kiwei kiwei.

“Kawei ka jingdonkam jong kane ka District kumjuh kiwei ki District hapoh ka jylla ka long ban pynkhlain iaka khaii ka pateng bad ka ri Bangladesh. Ngi don iaka kabu ba lada la wanrah iaki kad khaii ne ki iew border kiba biang ka jaitbynriew kan long kaba riewspah bad kaba bit kaba biang. Lada phi ki nongshong shnong jong ka Khasi Jaintia phi ibit ia u kyrtong ka RDA ngin iakren iaka sorkar India ban plie iaki kad khaii kiba bit ba biang ha East Jaintia Hills, West Jaintia, South West Khasi Hills bad East Khasi Hills ban kyntiew iaka ioh ka kot,” ong u Bah Robert.