Ka ‘Reservation Policy’ kam treikam haka jingkyntiew kyrdan iaki Pulit

Syllad | The Rising MeghalayaOctober 19, 2024

Da kaba pynpaw ba kam don satia ka ‘Reservation Policy’ ne ka jingbhah kyrpang ha kaba iadei bad ka jingkyntiew kyrdan ia ki Pulit hapoh ka Tnad, na ka liang ka Tnad Meghalaya Police ha ka 18 tarik u Risaw ka pynshai ba ka jingkyntiew kyrdan ka dei beit kaba la pynshong nongrim halor ka jingshakri slem ha ka kam bad ka jingtreikam bha bad ka jingdon jong ki kam kiba lait.

Ia kane la pyntip da u Assistant Inspector General of Police (Law & Order) u Bah Vivek Syiem IPS hadien ka jingmih ki jingkynnoh ba ka tnad MLP ka la pynkhein ia ka reservation policy ka Jylla halor ka jingkyntiew kyrdan ia ki Havildar sha ka Armed Branch Assistant Sub Inspector.

Haba phai sha ka jingkyntiew kyrdan ia ka Havildar jong ki Battalion sha ki AB-ASI, u bah Vivek ula ong ba ia kane ka kam la leh thik katkum ka circular bala pynmih da ka Ophis DGP (Circular No 65/2012 dated 25/09/2012).

U Bah Vivek u la ong ruh ba ha kine ki ar snem ba la leit ki la don haduh 1471 ngut ki pulit kiba ha ki kyrdan bapher bapher ki ba la ioh ia ka jingmynjur ban kyntiew kyrdan, bad ia baroh kine ki jingkyntiew kyrdan la pyndep katkum ki kyndon bad hukum ba la pynmih da ka ophis DGP.

Ki post jong ki AB ASI ki long tang ha ki shipai India Reserve Battalions, kata ka 3rd MLP (1st IRBN), ka 4th MLP (2nd IRBN), ka 5th MLP (3rd IRBN) bad ka 6th MLP (4th IRBN) bad ki jingpynkiew kyrdan ruh tang ha kine ki shipai.

U Syiem u la pyntip sha ki 141 ngut ki Havildar na baroh ki distrik bad ki battalion kiba don ki post Havildar, bad kila ai iaka jingmynjur halor ka jingkwah jong ki ban bishar haka ban kyntiew kyrdan.

U la ong ruh ba ka Committee ba la thaw na ka bynta katei ka jingthmu ka la shong ha ka 07.10.2024 ia kaba la khlieh da u DIG (TAP) bad la iashim bynta lang da ki Commandant (COs) jong ka 1st, 3rd bad 6th Battalion, nalor ki Additional Superintendent of Police (Addl. SP) and Deputy Superintendent of Police (Dy.SP) Training & Armed Police (TAP).

Ha kane ka jingbishar kam ka Committee ka la bishar bniah bha ia baroh katkum ki rekod khnang ba ka jingjied kan long da ka lynti kaba khuid ba suba,” u la ong.

“Hadien ba la pynlong ia ka jingbishar bad peit bniah ia baroh ki jingtip ba iadei bad ka jingshakri ka committee ka la aijingmut ia ki kyrteng jong ki briew kiba dei hok sha u Asstt. Inspector General of Police (A) (AIG A) ban bishar bniah shuh shuh bad hadien kane la pynmih ia ka hukum kyntiew kyrdan,” bynrap shuh shuh u Bah Vivek.