Ka Reservation Policy thymmai kam dei ban kyntait ia ka bhah 4% iaki briew ba duna dkhot met

Syllad | The Rising MeghalayaOctober 4, 2024

U Secretary ka Bethany Society u Carmo Noronha ha ka 3 tarik Risaw u la ong ba ka State Reservation Policy bathymmai kam dei satia ban kyntait ia ka bhah kaba 4% ha ka liang ka ioh kam ioh jam na ka bynta ki briew kiba don jingduna ha ki dkhot met hapoh ka Jylla Meghalaya.

Hadien ba la phah ia ka jingai jingmut sha ka Expert Committee halor ka State Reservation Policy kaba la pynlong ia ka public hearing ha ka nongbah Shillong, u Noronha u la ong, “Ka mat kaba ngi pynsngew ka long ba ka State Reservation Policy ka dei ruh ban iaid ryngkat bad ka Rights of Persons with Disabilities Act, 2016 bad ruh ka Meghalaya State Policy for Empowerment of Persons with Disabilities. Baroh kine ki policy bad ka ain ki pynthikna halor ka bhah kyrpang kaba 4% ha baroh ki kam sorkar na ka bynta ki briew kiba don jingduna ha ki dkhot met.

“Ka jingai jingmut jong ngi ka long khlem da khein ia kaei ka polisi jong ka jylla, ka polisi jong ka jylla kam lah ban iehnoh ia ka jingbuh kyrpang ba 4% namar ha kane ka por ka jingbuh kyrpang 4%, ka sorkar ka pyrshang ban bud ia ka hynrei ka jingshisha kam shym la bud bad ngi sngew ba ka dei ban don hangta ha ka kyrdan district na ka bynta ki briew ba don jingduna ha ki dkhot met katkum ka Ain bad katkum ka kyrdan pule jong ki bad ki kam kiba lait” ula bynrap.

Haba kylli halor ka jingdon jong ki briew kiba duna dkhot met, u Noronha u la ong, “Katkum ka khanasamari ki don kumb 2.1% hynrei ngi ngeit ba ka kham palat ia kata..Lada phi iaid katkum ki khanasamari ki ri ka pyrthei bad kiwei kiwei, ka long ban kot hapdeng ka 8 haduh 10%, hynrei ka sorkar ka la iaid da ka jingkhein jong ka khanasamari kaba long 2.1%. Kane ruh kadei kawei na ki jingeh halor ka jingioh ia ka jingkhein bad ka jingioh ia ka jingithuh kaba bniah halor ka jingdon jong ki briew kib don jingduna ha ki dkhot met.”