Ka resol pre quarter final ka Under-17 Girls haka Subroto Cup ha Jowai

Syllad | The Rising MeghalayaJune 20, 2022

Ka Subroto Cup ne ka Inter School football tournament kaba pyniaid da ka ophis u District Sports Officer (DSO), West Jaintia Hills kaba la pynsangeh naduh ka 17 tarik hadien ka jingwan ther jur u slap, kala sdang biang da ka jingiakhun pre quarter final haka kyrdan Under-17 Girls haka sngi Nyngkong.

Ka resol jong jingiakhun kaba long ha Kiang Nangbah Stadum haka sngi Nyngkong, ka long ba 7 tylli ki skul kila buh jaka ialade haka quarter final bad kine ki kynthup iaka Police Public SS, Riwar Jaintia Church of God SS, Kiang Nangbah HSS, Little Flower HSS, Lumpyrtuh, SS, Moodymmai SS bad ka Jowai Govt UP RMSA School.

Nalor kitei ki 7 skul ka North Liberty HSS ruh kala rung haka quarter final.

Ka Police Public SS kala pynliem da 1-0 iaka Govt Girls’ HSS, ka Riwar Jaintia CoG kala jop da ka tie breaker 3-2 iaka Adventist HSS.

Ka Kiang Nangbah HSS kala jop da 2-0 iaka Seinraij HSS, ka Little Flower HSS la rai iaka nam jop jong ka da ka tie breaker pyrshah iaka Pdengshakap SS da 3-2.

Ka Lumpyrtuh ss ruh kala pynliem da ka tie breaker 5-4 iaka Achievers SS, Moodymmai kala jop da 2-1 iaka Jaintia SS bad ka Jowai Govt UP RMSA kala jop da ka tie breaker da 4-2 iaka Ummulong Press HSS.