Ka Riiohlang Dhar kan mihkhmat iaka India kum ka assistant referee ha ka FIFA U-17 Women’s World Cup

Syllad | The Rising MeghalayaAugust 19, 2024

Ka Riiohlang Dhar ka la jam ia u mawjam ba kongsan tam da kaba kylla long ka kynthei kaba ar na India ka ban shah jied kum ka assistant referee na ka bynta ka lympung ialehkai phutbol kynthei ha ka pyrthei ka FIFA U-17 Women’s World Cup 2024.

Ka Riiohlang 34 snem rta na Meghalaya kan leit mihkhmat ia ka India napdeng ka kynhun ba pawkhmat jong ki 38 ngut ki nongpyniaid ba la thung da ka FIFA na ka bynta katei ka lympung ialehkai kaba heh ka ban long ha Dominican Republic naduh ka 10 tarik u Risaw haduh ka 3 tarik u Naiwieng 2024.

Ka Uvena Fernandes ka dei ka kynthei nong India kaba nyngkong eh ka ban shah jied kum ka assistant referee na ka bynta ban pyniaid ia ka jingialehkai World Cup, kata ha ka FIFA U-17 Women’s World Cup 2016 kaba la long ha Jordan.

“Ka jingshah jied ka jong nga na ka bynta ka World Cup ka la long da shisha ka burom kaba khraw na ka bynta jong nga,” ong ka Riiohlang kaba trei hapoh ka tnad Meghalaya Police. Nga hap ban trei shitom shuh shuh ban poi sha ka thong katkum ka jingkhmih lynti jong ka FIFA. Ngan buh ruh ia ka jingmut ba ngan don ha katei ka jaka kum kaba leit mihkhmat ia ka Ri India. Ngan leh ia kaba bha tam ban kyntiew ia ka lama jong ka ri India kham shalor,” ong kane ka Assistant Referee.

Ka Riiohlang kaba dang long marwei ka la ong ba ka kam referee ka la long ka bynta jong ka jingim jong ka naduh u snem 2009. “Hadien ba nga la sangeh na ka jingialehkai phutbol, nga la leit pyniasoh bad ka jinghikai refree hapoh ka shnong jong nga bad shem ba ka long ka kam kaba sngewtynnad namar kan pynlong ia nga ba ngan iakynduh bad ka jingialehkai kaba nga sngewtynnad bad ieit eh. Kumta nga la shim ia ka rai ban shim ia u bisil (whistle) bad ia ka lama. Nga la iaid ia ka lynti kaba jlan bha naduh katei ka por. Nga la ioh ban khmih ha kiba byntylli ki lympung ialehkai ha ka pyrthei, hynrei ka World Cup kan dei kaba kham pher kaba ngan ioh mad,” ka la ong.

U Chairperson ka AIFF Referees’ Committee, u K Sankar u sngew ba ka jinglah ban iashim bynta bha jong ka Riiohlang ha ki lympung jingialehkai jong ka AFC bad FIFA ka la kylla long kawei na ki daw ba kongsan halor kane ka jingshah jied ka jong ka. Ha ka AFC U-17 Women’s Asian Cup ha Indonesia, ka Riiohlang ka la long kum ka nongialam ha kawei na ki jingialehkai semi final bad kumjuh ruh ha ka jingiakhun ia ka kyrdan kaba lai.Ka jingshah jied ka jong ka, ka long da shisha ka burom ia ka AIFF kumjuh. Na ka liang ka Refefree Committee, Nga kitbok kitrwiang ia ka na ka bynta kane ka jingleit iashim bynta ka jong ka sha ka World Cup,” ong u Sankar.

Ka Batbitbha Bareh ka National Referee kynthei ba nyngkong eh na East Jaintia Hills

Kumjuh u Acting Secretary General ka AIFF, u M Satyanarayan u la ong,”Ka jingpynbna jong ka FIFA ia ka kyrteng jong ka Riiohlang ba ka don napdeng ki nongpyniaid na ka bynta ka U17 Women’s World Cup ka long kum ka jingai sngewbha Independence Day na ka bynta jong ngi. Dang shen ngi la sdang ban pynleit jingmut ban kyntiew bad pynroi ia ki referee. Ban seng nongrim, ngi la thung ia ki san ngut ki zonal refree development officer. Ka jingshah jied jong ka Riiohlang Dhar kan nangkyntiew ia ka jingbun ha ka jingdon ia ki nongkitkam kiba dei ki kynthei hapoh ka Ri India.”

Ka Riiohlang ka tip ba ka dei ka jingiatreilang kaba la ialam ia ka haduh katne. “Khlem ka jingiarap jong ka seng ha ka Jylla jong nga, ka AIFF bad ki heh ba dei khmih ia ka kam ngan ym poi shaudh ka World Cup. Ka AIFF ka la lah ia ka kam kaba khraw ha ka ban kyntiew bad pynroi ia ki refree kynthei. Baroh ngi la ioh shibun ki jingmyntoi,” ong ka Assistant Referee. Courtesy: AIFF Media Team