Ka rukom plie dukan haka ki kynta Curfew ha East Khasi Hills District

Syllad | The Rising MeghalayaMay 9, 2021

Ka District Magistrate, East Khasi Hills District, Isawanda Laloo hadien ba la pynjari iaka Curfew naduh 10 haduh 17 tarik, May 2021 ha ka district baroh kawei, ban pynsuk iaki ba ki paidbah nongshong shnong ba kin ioh ban thied ban pet ia ki jingdonkam ba man la ka sngi kala rai ban plie iaki dukan marbam naduh sngi Nyngkong haduh Thohdieng naduh ka por 9 baje mynstep haduh 7 baje jan miet.

Ki dukan kiba lah ban plie:

Tang ki dukan kiba die ia ki marbam mardih bad ia ki tiar ba donkam eh kiba la jingpynbeit da ki Incident Commander jong man la ki Zone kiba don hapoh Sor Shillong bad ki jaka ba marjan, kin lah ban plie naduh sngi Nyngkong haduh sngi Thohdieng, naduh ka por 9 baje mynstep haduh 7 baje janmiet khnang ba ki paidbah nongshong shnong kin lah ban thied ban pet ia ki mar ba donkam eh.

Baroh ki shnong/dong ki la jied ia ki dukan ha la ki jong ki jong ki shnong/dong, bad ki bor shnong/CCMT kin pyntikna ba ki paidbah nongshong shnong kim dei ban mih shabar na la ki jong ki shnong/dong na ka bynta ban thied ia ki mar ba donkam ban lait na ka jingkhapngiah ne jingsaphriang shuhshuh jong u khniang jingpang.

Na ka bynta ki shnong kiba don ha ki thain nongkyndong jong ka District, ia kane kajuh ka jingpynbeit yn sa pyntreikam da ki Sub-Divisional Officer (Civil)/Block Development Officer/Incident Commander ha ryngkat ka jingiatreilang bad ki Rangbah Shnong bad ki CCMT.

Ki Rangbah Shnong, CCMT bad ki kynhun ba peit ia ka bha ka miat hapoh shnong poh thaw, kin pynbeit ia ka jingtreikam jong ki dukan ha la ki jong ki jong ki shnong/dong bad ruh ban pyntikna ba ki paidbah nongshong shnong kin bud ryntih ia ki jingbthah ba la pynmih da ka tnat ka Koit ka Khiah.

Ki paidbah ki dei ban bud pyrkhing ia kine ki kyndon harum haba ki leit thied leit pet:- 

1. Ban deng barabor ia ki mask

2. Ban pyniajngai iwei na iwei pat ym duna ia ka 1 mitar

3. Ban ym ia lum bun briew tang ha kawei ka jaka/dukan bad ruh ban ym pynjlan por palat hapoh dukan.

4. Ban iatrei lang bad ki jingpyniaid jong ki Rangbah Shnong/CCMT bad jong ki Incident Commander.

Na ka bynta ka jingpynpoi ia ki jhur, lah ban ia pynbeit bad ka NARI/1917iTEAMS bad kiwei pat ki nongpynbiang mar ba la ithuh. Lada don da kiwei pat ki rukom pynbeit hapoh shnong/dong, dei ban pyntip sha ki Incident Commander khnang ban lait na kino kino ki jingbym ia sngewthuh jingmut bad ia ki Car Pass yn ai hi da ki Incident Commander ha la ki jong ki jong ki Zone.

La ai hukum ia ki BDO ban pynkhie im ia ki iew na ka bynta ki mar rep ha man la ki Block bad ha ki jaka ba ia khap bad ka sor Shillong, ha ryngkat ka jingiatrei lang bad ka Tnat ka Rep ka Riang, ki nongpynmih mar rep bad ki Rangbah Shnong, khnang ban lah ban pynbiang ia ki jingdonkankam ha la ki jong ki dong bad ba ki nongrep kin lah ban die ia ki mar rep jong ki bad ruh ban kiar na ka jingiarung ia mih hapoh Sor Shillong ha ki sngi bad ki taiew ki ban bud.

Ia ki mar bam mar dih (Stock) ym don jingduna eiei bad kane ka Ophis ka la peitngor bha halor kane ka bynta. Ki dukan ba die ia ki mar bam mar dih kin bteng ban plie kumba la ju pynbeit na ka por sha ka por, te ki paidbah kim dei ban tieng ne mih shisien mih ha ki por ba plie.