Ka Rymbai Presbyterian HSS, Khliehriat HSS bad KB Memorial SS ki lahduh ka Subroto Cup na East Jaintia Hills, wan sakhi lang u Halen Nongtdu

Syllad | The Rising MeghalayaJuly 8, 2023

Ka Rymbai Presbyterian Higher Secondary School, Khliehriat Higher Secondary School bad ka KB Memorial Secondary School kila rah iaka nam lahduh haka District Level Inter-School Subroto Mukherjee Cup Football Tournament kaba pyniaid da ka ophis ka District Sports Officer, East Jaintia Hills District.

Kane kala wan hadien ba kine ki skul kila jop iaka jingiakhun phainal kaba long haka sngi Saitjain ha madan ialehkai ka East Jaintia Hills District Sports Association ha Dienchynrum.

Haka jingiakhun final U-17 Boy’s, ka Rymbai Presbyterian Higher Secondary School,kala jop da 2-1 iaka Wapung Higher Secondary School katba ha ka U-17 Girl’s ka Khliehriat Higher Secondary School kala jop da 1-0 iaka Lotus Secondary School, Dienchynrum.

Haka jingiakhun ki khynnah Under-14 Boy’s, ka KB Memorial Secondary School, Wapung kala pynliem da ka tie breaker da 3-1 iaka Chiehruphi Secondary School. Da kane ka namjop kine ki skul kin mihkhmat iaka East Jaintia Hills District sha ka State Level ka ban long ha une u bnai.

U kongsan ba wan sakhi ia kane ka jingiakhun final u dei Deputy Commissioner, East Jaintia Hills District Abhilash Baranwal, IAS, ha ryngkat u Captain U-20 Indian National Football Team u Halen Nongtdu, u nongshah khot sngewbha ba kyrpang ban ai mynsiem aiki khynnah ialehkai.

Ka khunsam Best Player la ioh rah da u Bisterly Ksih of Rymbai Presbyterian Higher Secondary School haka Under-17 Boys, ka Filicia Sympli naka Khliehriat Higher Secondary School na ki kynthei Under-17.

U Lyonel Ryngkhlem ka KB Memorial Secondary School ula ioh iaka nam Best Player na ki Under-14 Boy’s.

Kiwei kiwei kiba iadonlang ki dei u ma Finelyness Bareh, MDC Rymbai- Khliehriat, District Sports Officer, kong Stephanie Rapsang, C Tlang, General Secretary, East Jaintia Hills District Sports Association bad James Sutnga, Working President, East Jaintia Hills District Football Association..