Ka samla Darilin Tang kawei na ki nongmihkhmat iaka India haka prorkam sam jingtip kylliang ha Japan

Syllad | The Rising MeghalayaDecember 13, 2023

Kan long ka jingsarong kaba khraw ia ka jylla hi baroh kawei hadien ba ka samla Darilin Tang kaba dei na ka shnong Iooksi, Jaintia Hills, kaba dei ruh ka Research Scholar na ka department of Management, NEHU, Tura Campus ka la shah jied ha ka Tnat Youth Affairs ka Sorkar India ban leit iashim bynta ha ka prokram Japan- East Asia Network of Exchange for Student and Youth (JENESYS) 2023, ka ban long ha Japan.

Ka JENESYS 2023 ka dei ka exchange programme ba la khot pynlong da ka Japan International Cooperation Centre (JICE) ka ban long naduh ka 12 haduh ka 19 tarik mynta u bnai. 

Mynta u snem ia kane ka exchange programme yn pynlong ha ka nongbah Tokyo lem bad kiwei pat ki jaka ha Japan.

Ka samla Darilin kan dei kawei napdeng ki nongmihkhmat ka ban leit iashim bynta ha katei ka prokram ban mihkhmat ia ka India napdeng ki phra ngut ki dkhot na kane ka ri. Lah ban kdew ba ka samla Darilin Tang ka dei tang ma ka, ka ban ioh ban leit mihkhmat napoh kane ka thain shatei lammihngi jong ka ri (North East).

Ka JENESYS ka dei ka prokram iamir jingmut hapdeng ki para briew ia kaba la plie ha ka snem 2015 hapdeng ka Japan bad ki ri ka thain Asia Pacific.

Ki samla nongmihkhmat na ki hynriew tylli ki ri bapher bapher, kata kynthup na India, Sri Lanka, Maldives, Nepal, Bangladesh bad Pakistan kin iashim bynta ha kane ka exchange programme.

Ka jingthmu ba kongsan jong kane ka prokram ka long ban kyntiew ia ka jingshaniah bad ka jingsngewthuh jingmut hapdeng ki nongshong shnong ka Japan bad kane ka thain Asia Pacific, bad ruh ban tei ia ka jingiadei paralok bad ka jingiateh hapdeng jong ki.

Kane ka long ruh ban pynshlur ban sngewthuh bad ioh jingtip ha kaba iadei bad ka ioh ka kot jong ka Japan, ka imlang sahlang, histori, ka kolshor, politik bad ha ka jingiadei kam bar ri, kata ban tei bad pyniasoh ha kine ki bynta.