Ka Selection Trial ka SAI, STC Shillong: Ka kabu kaba khraw ia kiba don sap haka Athletic, Boxing, Football bad kiwei ki jingialehkai

Syllad | The Rising MeghalayaSeptember 11, 2023

Lehse kan long ka kabu kaba khraw na ka bynta ki khynnah ialehkai sport ka jylla kiba don ia ki sap ha ki jait jingialehkai bapher bapher hadien ba ka Sports Authority of India (SAI) lyngba ka Residential bad Non Residential Scheme kan sa pynlong da ka ‘selection trial’ ne ka jingjied ia ki khynnah ban pynrung ha ka SAI, STC, kata kynthup ia kiba don sap kum ka Archery, Athletic & Boxing, Judo, Karate bad Football.

Ia kane ka jingjied yn bishar ruh lyngba ki rekod kiba kine ki nongialehkai ki la ioh ban khur ha rynsan ïakop kiba la kham paw, kata kum ha ka kyrdan District, State, National bad International Level bad ruh lyngba ki test katkum ka snem bad ka sap kaba ki don.

Ki nongialehkai kiba ju iashim bynta ha ki lympung bapher bapher ki donkam ban wanrah 2 tylli ki dur passport size bad dang shen lem bad ka Aaddhar card, ka Birth certificate bad ruh ki certificate kiba la ïohpdiang na ki jingïalehkai sports. Ka rta jong U/Ka ka dei ban long shajrong 12 snem haduh 18 snem haduh 01-04-2023.

Naka bynta ki jingialehkai shi kynhun: kan long 10 snem haduh 14 snem kumjuh 15 snem haduh 18 snem. Nalor kata ki nongialehkai kiba tbit hynrei kiba la palat lane duna ia ka snem ba la buh kin ym shah kyntait hynrei yn bishar bniah katkum ka jingjop jong ki haki jingialehkai da ki riew shemphang ne ki expert.

Ha kaba iadei bad ki jingialehkai shimet, kito kiba la ju kiew rynsan teng ha ki kyrdan ba hakhmat ha ki District Championships, Inter- Education District Level competitions, championships ba la pynlong da ka Confederations of Public Schools, CBSE, Kendriya Vidyalayas, Navodaya Vidtalayas, PYKKA ba kiwei kiwei.

Katba na ka bynta ka Team Event ki nongialehkai kiba la ju iashim bynta ha ki jingiakop kum ka State level ba la pyniaid da ka State Sports Associations, State Sports Council, School Game National  bad ka State Sports Departments ki lah ban iashim bynta ha kane ka jingjied. Nalor kata ki nongialehkai ki donkam ruh ia ka Medical Fitness Certificate.

Shuh shuh ka jingpynrung ia ki nongialehkai ba tbit hapoh ka SAI yn sa pynthikna hadien ba ladep ban bishar bniah ia ka rta bad ruh ka medical examination jong ki. Kumjuh na ka bynta ka jingjied nongialehkai ha ka Archery, Karate,  Boxing, Judo (shynrang & kynthei) hapoh ka scheme Residential & Non Residential, SAI; yn pynlong ia ka jingjied ha  madan Sports Authority of India kaba ha NEHU Campus Shillong ha ka 18-19  tarik Nailur,  ha ka por 8 baje mynstep (12 haduh 18 snem ). Na ka bynta ki Athletic (shynrang bad kynthei ), kiba hap hapoh ka SAI, Residential Scheme, kan long ha ka 14 bad 15 tarik Nailur, 2023; 8.00 baje mynstep (12  haduh 18 snem).

Katba ha kaba iadei bad ka football (tang na ka bynta ki shynrang) kaba hap hapoh ka SAI, Residential & Non Residential Scheme yn pynlong ia kane ka jingjied ha madan SAI, NEHU Campus Shillong, ka ban sdang naduh ka 20 haduh 23 tarik Nailur, ka por kan long naduh 8 baje mynstep na ka bynta kiba shajrong 10 snem bad hapoh 14 snem, bad ruh na ka bynta kiba shajrong 15 snem bad 18 snem shapoh.