Ka seng Congress shen kan sa jah kyrteng noh na Meghalaya; iathuh lypa u Dy.CM

Syllad | The Rising MeghalayaAugust 22, 2024

U National General Secretary ka Seng NPP uba dei ruh u Symbud Myntri Rangbah ka Jylla, u Bah Sniawbhalang Dhar u la iathuh lypa ba ka Seng Congress shen kan sa jah kyrteng noh na ka Jylla Meghalaya.

Haba kren sha ki lad pathai khubor ha ka 21 tarik Nailar, u Bah Sniawbhalang u kren bad pynpaw halor ka jingwan pyniasoh ba dang shen jong ki laingut ki MLA ka Congress ha ka NPP da kaba ong, “La iohi kumba ka iaid sha kata ka lynti ) shen ka Congress kan sa jah kyrteng noh na Meghalaya.”

U la ong ruh ba kum u nongialam barim ka Congress u la shim ia ka rai ban mih noh na kane ka party ha u snem 2017 namar u la tip thikna ba kane ka party kan sa ngam noh.

“Balei ba nga leit iasoh sha ka NPP, namar ba nga tip ba ka Congress kan sa ngam noh bad ka jingbatai lypa ka jong nga ka dei kaba biang.Kumta ha u snem 2017-2018, nga la leit ban pyniasoh ia lade sha ka NPP namar nga tip ha katei ka por ba ka Congress kan sa ngam noh ha kano kano ka por,” u la bynrap.

Nalor kata u la ong ruh ba kine ki laingut ki MLA ka Congress ki la wan pyniasoh sha ka NPP ha ka por kaba biang bha.

Haba kylli, une u nongialam ka NPP u la ong ba ka party jong u ka long kaba kloi ban pdiang ia u nongialam ba hakhlieh ka Congress uba dei ruh u MP barim ka Shillong u Bah Vincent H Pala shapoh ka kynhun. “Lada u Pala un wan, ngi long kiba kloi ban pdiang sngewbha ia u.”

Ha kaba iadei bad ka jingkynnoh jong u Pala ba ka NPP ka la pyndonkam da ka pisa beain ban beh thong ban thied ia ki MLA Congress, u Bah Sniaw u la ong, “Phi lah ban kylli na la ki jong ki MLA ka party kiba la wan pyniasoh sha ngi dang shen. Ngam dei u briew uba dei ban kren ia kane ka phang. Ki MLA  jong u ki la pynpaw shai ba ka jingwan pyniasoh ka jong ki ka dei kaba la pynshong nongrim khamtam eh halor ka roi ka par. Ki lah ban kynnoh hynrei kam don ka jingshisha.”

“Phi iohi, ki dei ki nongthaw ain, ki ieng ha ka nongrim jong ka roi ka par kumba ki la pynpaw shai sha ki lad pathai khubor. Lehse baroh ki dei ki nongialam ba la rim, bad ki la pynpaw shai ruh ba ki donkam ia ki kam pynroi na ka bynta ki nongshong shnong.Lehse ki la iohi ia ka rukom treikam kaba biang jong ka sorkar. Kane lehse ka dei kawei na ki daw kaba la pynlong ia ki ba kin wan iasoh sha ka NPP,” u la ong.

Shuh shuh u Bah Sniaw u la kubur ba ka sorkar kam lah satia ban ai skhim palat sha baroh ki constituency hynrei u la ong, “Nga la pyrshang kum ka sorkar ban leh ia kaba bha tam.Ym don kawei ruh ka constituency kaba la biang lut ha ka roi ka par, hynrei na ka liang ka sorkar ka la pyrshang borbah ban pynioh ia ki kam pynroi sha baroh ki constituency.”