Ka Seng Kutsnem

Syllad | The Rising MeghalayaNovember 22, 2020

Ngi ai khublei Seng Kutsnem basuk bakmen ïa baroh ki kur ki kha haka Ri.

Mynta ka snem ka don ka jingpher haka pyrthei baroh kawei, ha kaba la wanjia ka khlam ka ngoh kaba ngi hap ban pynïajngai para bynriew (lane ka jingphetrieh ka jingpynkyrpang ïalade sha khlawbah khlawsan kumba ju leh ki riew mynshwa) ban ïada ban lait naka jingïabit jingïapur jong u khñiang jingpang khlam.

Namarkata, hapdeng jong kane ka jingjia, to ngin pyndep ïa ka jinglehkmen rakhe Seng Kutsnem  hala i jong i jong i ïing, hala i shnong i kyntoit, ynnai ïalum ynnai ïalang paidbah, to ngin bud pyrkhing ïaki kyndon bala bthah ka sorkar.

Kaei Seng Kutsnem? Balei la buh la seng ïaka Seng Kutsnem?

Ki daw bah ba la seng bad buh nongrim ïaka Seng Kutsnem. To ngin ïakyrtiang dien khyndiat ïaka mynnor khnang ban lap ïaka daw bala seng la buh ïaka Seng Kutsnem. Haki laispah snem mynshuwa, kata haka snem 1700(Common Era) sharum ka Jaidbynriew Khasi Khara ka imsuk imsaiñ hala ki niam ki rukom, ki riti ki dustur katkum ka pyrkhat tynrai kaba la kyrsoi naka thymmei wan longbriew jong u Khun Khasi Khara na mynnyngkong. Ki longshuwa manshuwa ki hikai shaphang ka Hok, ka Tipbriew ka Tipblei, ka Tipkur ka Tipkha, ka Ieid ïalade bad ka burom ïa kiwei. Kiei kiei ki ïaidbeit ki ïaidryntih. Ki jingmut ki jingpyrkhat ki longkhuid ki longlaitluid, ym don jingwit jingwa, ka jingim ka long shisur shidur, ka jingim ka long tang bad ka mariang ryngkat ka jingshaniah skhem ha U Blei Nongthaw.

Hynrei haka snem 1740 khlieh ei ei  ka sorkar phareng ka la jopthma kylleng ka pyrthei kynthup ïaka Ri Hynñiewtrep jongngi. Ki phareng hadien bala jopthma ki ïoh lad ban knieh ïaka jingsynshar naki trai ri trai muluk. Hapoh ka jingsynshar jong ki phareng, ka Jaidbynriew ka la mad ïaki jingshah krenbeiñ ba har-rukom haki riti ki dustur bad khamtam eh ïaka jingngeit Blei ka jingmane Blei bad ki lehniam lehrukom kiba la saiñdur janai daki longshuwa ki manshuwa u khun Khasi Khara. Ki phareng kim kwah satia ba ka Jaidbynriew jongngi kan long ïatylli, kumta ki sdang ban ïaid da ki buit shukor, ki pynthynrei ïaka ngeit ka mane, da kaba hikai ban isih ïala ka niam ka rukom, ïala ki hok ki riti, ki khang ban ïashim bynta haki jinglehniam bad haki shad ki kmen, ki khang ruh ban thang ïaka met ïap.

Ki phareng ki kynnoh beiñ ïaka jingngeit Blei jongngi, kum ki nongmane ksuid, ki riewkhlem niam, ki riewngeitbieij bad kiwei kiwei ki jingkynnoh kiba ktah matïong ïaka pyrkhat tynrai jong ka Jaidbynriew. Ki phareng kim kheiñsang ban kynnoh nonglehpap ïa ki kmie ki kpa bad wat ïa i khyllung ba dang shu kha. Ha kajuh ka por ki phareng ki pynap shrip artat artat da kaba ki khroh ki pynbieij ïaki kur ki kha ban bud ban kylla sha ka niam jong ki. Kane ka jingleh buit sianti ki phareng ka la treikam shisha ha kaba bun ki kur ki kha ki don hapdeng ka jingkulmar jingmut, bad kito kiba tlot ïaka jingngeit ha U Blei kaba katkum ka jinghikai ki longshuwa ki manshuwa ki bud noh ïaka niam ki phareng. Kito ki kur ki kha kiba la bud ïaka niam ki phareng ki sdang ban ïaleh pyrshah ïa kiei kiei kiba la ju leh ha-ïing ha sem, ha shnong ha thaw, kata ban lehniam ha-ïing ha sem kim mynjur shuh, ban lehniam ha shnong ha thaw ruh kim treh shuh.

Kane ka jingpynkylla niam ki phareng ka la phiah bad pharia ïaka Jaidbynriew arliang. Ki kur ki kha kiba don hala ka Niam la jong, ki don hapdeng ka jingsngewsih ka jingsngewdiaw, ki don hapdeng ka jingshaïong ki jingmut jingpyrkhat, ki hap ban shu dem laka khlieh bad kim nud shuh ban khmied laki khmat sha kita ki nongsynshar.  Ki kur ki kha kiba la kdup ïaka niam ki phareng ki ïaid baheh bad leh phareng lem, bad ki da nud hi wat ruh ban kren jyndat ïala ki hok ki riti kumba kynther jymbuin da ka sur kaba sawa jam ki rwai “Ngi la iehnoh ïa baroh ki jinglong barim, naba ngi la ïoh iaka jingim bathymmai”.

Hangne la wan ka jingorpait haka jingpyrkhat ka jingpyrdain bad la mih ka jingïashrut para mangi hapoh ïing hapoh sem hapoh shnong hapoh thaw, haduh bala kulmar ka Jaidbynriew. Kiba don haka Niam tynrai ki ïaleh ban ïaipynneh ban ïaipynkhlaiñ ïala ka Niam bad ki hok ki riti, katba kiba pdiang ïaka niam ki phareng ki ïakhun dohïap ban pynduh jait noh ïa kane ka Niam bad ki hok ki riti bala kyrsoi naka Jaidbynriew la jong. Ka buit pynïashrut ki phareng  ka trei borbah borsan haduh ba ym i don jingkyrmen shuh ïaka Niam tynrai ban dang khie khlieh, namar ba ym don nongpeit ym don nongsharai.

Ki kur ki kha kiba don haka Niam tynrai la jong, ki sah haka lyngngoh ki sah haka umdum, kim nang kim tip shuh ban pyrkhat kaei ka ban jia ïaki. Donbok U Blei Kynrad Uba ïohi lut ïa kiei kiei, U pasiaw haka jingmut jingpyrkhat jong ki riewrangbah bad ki samla kiba ieij ïala ka Jaidbynriew. Kita ki riewrangbah bad ki samla kiba ieij ïala ka Jaidbynriew ki dap daka jingkhuslai bad ka jingpangnud ïa kata ka jingshah hiarthma jong ka Niam tynrai haka bor ki nongsynshar phareng, kumta ki sdang ban pynlong ïa ka jingïaphylliew jingmut para maki naka bynta ban thaw ïaki lad kumno ban ïada ïaka Niam bad ki hok ki riti jong ka Jaidbynriew na kane ka umsaw pynjot pynpra jong ki phareng.

Hadien ka jingïapyrkhat kaba la bunsien kine ki rangbah bad ki rangsamla ki la shim ïaka rai ban thaw ne tei ïaka kut ka ban long kum ka nongïada, ka nongpeitngor, ka nongkyrsiew, ka nongbtin, ka nongaimynsiem ïaki kur ki kha kiba don haka Niam kaba la kha bad kyrsoi naka jingwanlongbriew u khun Khasi Khara. Dei halor katei ka nongrim bala thaw ïaka kynhun kaba dei ka sengbhalang u khun Khasi Khara ïa kaba la jer kyrteng kum ka Seng Khasi bad kaba la pynkha haka 23 tarik bnai November 1899, ban long kum ka stieh kum ka kut ka ban iada naka bynta ki kur ki kha kiba batskhem ïala ka Niam tynrai la jong. Ïa kane ka sngi bala pynkha ïaka Seng Khasi la suit la shor kum ka sngi Seng Kutsnem. Ki nongiakit ki nongiabah banyngkong ïaka Seng Khasi ki don khathynriew ngut, bad kum ka Jaidbynriew ngim dei lano lano ban klet ïaki. Ka Seng Khasi ka wanlong ka wandur kum ka jingsaiñdur thymmai naka bynta ban sumar ban tyngkai bad ban pynkhlaiñ ïaka jingngeit tynrai u khun Khasi Khara. 

Ha kane ka Seng Khasi la pyntynrong bad la bynshet ba kan long kum ka nongkitkhlieh naka bynta ban nangpynskhem bad nangpynjanai ïa kiei kiei kiba kordor jong ki longshuwa ki manshuwa u khun Khasi Khara:
Ban long kum ka nonglum ka nonglang ia ki kur ki kha kiba batskhem katkum ka kheiñkur ka kheiñkha ki longshuwa ki manshuwa u khun Khasi Khara;

Ban long kum ka nongkyrsiew ka nongbtin ka nongpynshai ka nongpyni ïaki kur ki kha ban ïai pynneh ban ïai pynkhlain ïaki hok ki riti, bad khamtam eh ïaka Niam kaba la kha bad kyrsoi janai naka tynrai bah ka jingwanlongbriew u khun Khasi Khara;

Ban long kum ka nongïarap ka nongïakhien iaki kur ki kha haki jingdonkam jong ki kum haka ban pyndep ïaka nguh Blei ka dem Blei bala khot ka Lehniam;

Ban long kum ka nongpynkynmaw ka nongpynkyndit iaki kur ki kha ba ki dei ban im ban long kiba imhok imsot, kiba im tipbriew tipBlei, kiba im tipkur tipkha, kiba ñiewkor ïala ka jong bad kiba burom iaka jong kiwei;

Ban long kum ka nongkynpham ïaki kur ki kha ba ki dei ban ngeit bad mane tang ha U Blei Trai Kynrad Nongthaw Nongbuh Ubalah Ubaïai najrong hatbian.

Naduh bala seng ïaka Seng Khasi, ki kur ki kha haka Ri ki ïohmynsiem biang ban pynleit jingmut hala ka niam ka rukom bad ki hok ki riti kumba ju long. Namarkata, ka Seng Kutsnem ka ïeng kum ka sngi khraw ka sngi kyrpang jong ka Jaidbynriew Hynñiewtrep Hynñiewskum. Ka Seng Kutsnem ka dei ka sngi pynehrngiew ïaka Jaidbynriew Khasi Khara. Ka Seng Kutsnem ka dei ka sngi ban pynkynmaw ïaki kur ki kha ban ïengskhem haka nongrim jong ka Hok, kata, ban im ban long, ban leh ban thaw, ban ïaid ban ïeng, ban kren ban khana, ban mut ban pyrkhat bad kumta ter ter da kaba hok da kaba khuid bad da kaba bha kumba la saiñdur ki longshuwa ki manshuwa. Ka Seng Kutsnem ka dei ka jingrakhe kynmaw burom ïaki khathynriew ngut ki nongseng ïaka Seng Khasi. Ka Seng Kutsnem ka dei ka jingrakhe ïaka jingieij ïa la ka jong ka Jaidbynriew. Ka Seng Kutsnem ka dei ka jingrakhe ïaka jingstad ka jingshemphang jong ki longshuwa ki manshuwa u khun Khasi Khara. Ka Seng Kutsnem ka dei ka jingrakhe ïaka hok longbriew manbriew jong u khun Khasi Khara. Ka Seng Kutsnem ka dei ka jingrakhe kum ka sngi kyrpang ki trai ri trai muluk u khun Khasi Khara. Ka Seng Kutsnem ka dei ka jingrakhe ïaka jingjop jong ka Hok pyrshah ïaki jingpynbieij, ki jingpynshoi, ki jingpynthame bad ki jingshukor ba har-rukom. Ka Seng Kutsnem ka dei ka jingrakhe ïaka jingsaiñdur thymmai haka ban sumar ban tyngkai bad ban pynkhlaiñ ïaka jingngeit tynrai u khun Khasi Khara lyngba ka Seng Khasi. Ka Seng Kutsnem ka dei ka jingrakhe ïaka jingskhem jingmut haka jingngeit ha U Blei Trai Kynrad Nongthaw Nongbuh katkum ka saiñpyrkhat-niam kaba la kyrsoi naka jingwanlongbriew u khun Khasi Khara na mynnyngkong.

I Rgh. Rijoy Singh Khongshah i kynthoh shaphang ka pyrkhat tynrai u Khasi, kumne:  “Ka jingkhraw haka pyrkhat tynrai u Khasi, kam shym duna rynieng ne duna jingthew ei ei haba ïa nujor bad ka jingkhraw ka pyrkhat tynrai jong kiwei pat ki Jaidbynriew haka pyrthei”.

Da Samla R Khonglam & Rgh. R Khonglanoh, Nongthymmai Kyndiar, Riwar Mihngi, Pynursla.