Ka seng NPP ka don la ka jong ka jingithuh bad kam don ka jingiadei bad ka BJP, ong ka Kong Ampareen

Syllad | The Rising MeghalayaDecember 1, 2023

Ka kyrtong ka NPP na Shillong parliamentary seat kaba dei ruh ka Myntri sorkar ka jylla ka Kong Ampareen Lyngdoh haka 30 tarik Naiwieng, ka la ong ba ka Seng National People’s Party ka don la ka jong ka jingithuh bad kam don satia kano kano ka jingiadei bad ka Seng Bharatiya Janata Party (BJP).

Haba kren sha ki lad pathai khubor hadien ka jingialang iamir jingmut bad ki nongialam na Rilum Jaintia, ka Kong Ampareen kala ong “Nga don hangne ryngkat bad ki mat jong ka party bad ngi ieng halor kata bad ngi kyntait ia ka jingmutdur ba ka NPP ka don jingiadei bad ka BJP. Ka NPP ka don iala ka jong ka jingithuh. Ngim dei ban shah tap noh ha ki jingngeit bad ki rukom pyrkhat kiba long pyrshah ia ki paidbah ka jylla. Ngi dei ka NPP bad ngi long ki dkhot ka NDA bad kam  don kano kano ka jingma ban don lang ha ka kynhun synrop ka NDA.”

Nalor kane kane ka MLA ka East Shillong ka la ong ruh ba kam donkam ruh ban khmih ha kaba iadei bad ka niam, namar ki niam ki long kajuh hapoh ka jylla Meghalaya. Ngi dei ban pynpaw ia kane ka jingsngew shakhmat bad ngim dei ban ong ba X, Y, Z ki don ki don ia ka jingiadei bad kino kino. Ngi dei ban iatreilang ban weng ia kine baroh ha kane ka  ilekshon ka ban wan” kala ong.

Haba kylli halor ki rukom treikam jong u MP ka Seng Congress u Bah Vincent H Pala, ka Kong Ampareen kala ong “Ngam ieng hangne ban kdew ia ki kam jong kiwei, ngin long ki nongia aireng na ka bynta ka kam MP. Ngam lah ban ong kaei kaba u la leh, kaei kaba um shym la leh, ai ba ki paidbah hi kin bishar.

Lah ban kdew ba ka Dr Ampareen bad ka Agatha K Sangma ki dei kiba la shah pynbna kum ki kyrtong jong ka seng NPP na ka bynta kane ka ilekshon Lok Sabha ka ban wan.

Shuh shuh ka la ong ruh ba ka jong ka, ka la sdang ha ryngkat ki nongialam na baroh ki 7 tylli ki constituency hadien ka jingialang iamir jingmut kaba la long hynne ka sngi Palei.