Ka Shithi U DC | Kyntu ia baroh ban iatreilang ban lait babe hadien habud

Syllad | The Rising MeghalayaMay 8, 2021

Nyngkong eh nga ai khublei ia phi ki Waheh Shnong bad ki Nongialam Niam na ka bynta ka jingtrei shitom jong phi ryngkat ryngkat bad ki bor pyniaid ka West Jaintia Hills District Administration bad ka tnad ka Koit ka Khiah ba ngi la lah ban teh lakam ia ka jingpynsaphriang bad na ka jingktah ba shyrkhei jong u Covid-19 ha u snem 2020. Ha kane pat nga thoh ia kane ka shithi da ka mynsiem kaba sngewkhia ban iohi ba ki nongshongshnong ki kheinsting bad kim bud ryntih shuh ha kaba iadei bad kaba deng ia ki mask, kaba pyniajngai iwei na iwei bad sait ia ki kti kumba la hikai bad bthah da ka tnad ka Koit ka Khiah. Kat kum ki jinglum jingtip ba nga la ioh, la iathuh ba ki nongshongshnong haduh mynta kim pat kiar satia na ka jingialum lang bun ngut ha kajuh ka jaka la ka dei ha iing iapbriew ne jingkhawai bad kiwei kiwei.

Haba ngi peit na ki jingkynthoh (comments) ha ki social media ngi iohi ba ki don ki briew ki bym ngeit ba u Covid-19 u la rung ha kylleng ki shnong ki thaw ha ka District jong ngi. Kumta nga sngew dei ban pyntip ha phi ba ki nongpang Covid-19 ha ki shnong bapher bapher ha ka 4/5/2021 haduh 8:00 PM ki don 96 ngut.

(Chilliangraij- 2, Dulong-1, lawmusiang-2, longpiah-5, Khimmusniang 2, Mission Compound-2, Myntong-1, Pamhadem-1, Panaliar-3, Riatsiatsim-1, Umshyngiar-2, Wahnangbah-1, Dawki-1, Shnongpdeng-1, Nongryngkoh-3, Umdeinlin-1, LaiLyngdoh- 1, Mupyut-1, ATS Khliehtyrshi-1, Riatturiem-1, Sohmynting-1, Mowkaiaw-5, Mowtyrshiah-2, Mukhap-1, Raliang-4, Caroline Colony-2, Dongmihsngi-2, Ladthadlaboh-1, Lumpariat-1, Mookyrdup-2, Moosalyngkat-2, Newhill-2, Tyndoowapung-1, lalong-2, Lumbihsyntu-1, Mihmyntdu-3, Mihmyntdu Moomon-1, Nongbah Lumchor-1, Nongbah Mulang-2, Nongbah-1, Sabah Muswang-1, Salini Colony-2, Soomer Indian Petrol pump-1, longlwit-1, Nartiang-1, Nongtalang-1, Pdengshakap-2, Mooshrot-1, Sahsniang-1, Sahsniang B-2, Mynska-1, Shangpung-5, Shangpung Mission-1, Ladmukhla-2, Moodymmai-3, Ummulong-1).

Nangta, haba kheinlang jong u snem 2020 haduh ka 4/5/2021 ki mynsiem ba la duh noh na ka jingpang Covid-19 ki long 11 ngut ha ki shnong bapher bapher (Tpeppale-1, lawmusiang-1, Mission Compound-2, Mynthong-1, Moosalyngkat-1, Darrang-1, longnoh-1, Mihmyntdu-1, Nartiang-1, Shangpung-1).

Na ka jingdon ki nongpang kumba la kdew haneng ngi ioh jingkhein ba lada ki briew ki dang khein sting ka jingkiew jong ki briew ban ioh Covid-19 kan long 4/5 shah ha kine ki khyndiat sngi ban wan. Nangta ha ka jingpeit jong nga, ka la don ka jingpynthame da ki social media kaba pynartatien ia ki nongshongshnong wat la kiba la nang la stad kynthup ia ki nongtrei sorkar ban wan sha khmat ban shim ia ka tika. Dei na kine ki daw kiba la pynlong ia ka sorkar Meghalaya bad ki bor pyniaid District ban khang ia ki skul bad ki iew ha Jowai da ka jingthmu ban pynduna bad pynsuki ia ka jingpar bad saphriang u Covid-19.

Na ka liang jong ka sorkar, ka la don ka jingthmu ban pynbun ia ki jingthiah na ka bynta ki nongpang kiba donkam ia ka jingsumar ha ki hospital, hynrei lada na ka liang jong ki nongshongshnong kim don ka jingkitkhlieh ban pynduna ia ka jingpynsaphriang ia u Covid-19, kan poi ka por ba ki hospital bad kiwei kiwei ki jaka ai jingsumar kin ym don jaka shuh wat ia kito ki nongpang kiba donkam ia ka jingsumar.

Halor kane ka jingiohi nga kyrpad ia phi baroh ban ia snoh kti ban iatrei lang ryngkat bad ki bor District bad ka Tnad ka Koit ka Khiah.

• Ka Jingkylla ha ka rukom leh (Covid-19 appropriate behaviour) – Ka lad kaba lah hi ban pyndkhut ia u kynjri pynsaphriang na u Covid-19 ka dei ka khangshnong lane Lockdown. Hynrei kane ka ktah haduh katta katta ia ka ioh ka kot, kamai kajih, ka pule puthi, ki jinglehniam bad kiwei kiwei ki jingdon kam kiba man la ka sngi. Khnang ba ngin lait na ka jingkhangshnong, ka long kaba donkam haduh katta katta ban don ka jingkylla ha ka rukom leh (Appropriate behaviour change) da kaba bud ryntih ia kine harum:-

(i) Kaba deng ia ki Mask:- Wat shah iano iano ruh ban iaid sha surok, sha iew, ha ki jaka mane blei khlem da deng ia ki mask. Ki mask ruh ki dei ban don lai syrtap bad ban deng bha kat kum ki jingbatai ba phi ioh na ka Tnad ka Koit ka Khiah. Nga kyntu ia ki Dorbar Shnong, VEC, SHG, ki seng niam bad seng trei mon sngewbha (NGO) ban shim ia ki kynja soskular (Pledge) ban deng ia ki Mask.

(ii) Ka jingdonkam ban Test:- Lada don ka jingsngewshitom ha ka met kum ka baiongkhlieh, jyrhoh, suhkhriat bym don jingmad ki jingbam jingdih wat pynslem ban leit sha ki hospital/CHC/PHC/Sub Centre ban shim ia ki test. Ka jingpynslem ban kit sha hospital ban test ka buh ruh ia ka jingma ia kiba ha iing ha sem bad ka shnong ka thaw ban ia bit na u Covid-19.

(iii) Ban kiar na ka ialum paitbah ha kajuh ka jaka:- Ha ka Meghalaya bad ha West Jaintia Hills District ruh la shem ba ka jingpur sted jong u Covid-19 ka mih na jing leit on tep bad leit sngewlem ka iing iapbriew bad ha ki jingkhawai shongkurim. Dang shen na kawei ka jingleit on tep ha kawei ka longing ha ka shnong Darrang, Amlarem Sub Division, ka la pynsaphriang ia U Covid-19 haduh ban da hap khang shnong ia ki 6 tylli ki shnong 14 sngi lynter. Ka jingkyntu ia ki dorbar shnong bad ki nongialam niam ka long ba sngewbha ban pynbna tang hapoh 20 ngut ban don ha ka por leit on tep bad iathoh shongkurim. Na ka liang jong ki bor District kan pyrshang ban phah ia ki briew sorkar bad ki pulit peit ban pyntrei ia ka ain ba la buh da ka sorkar.

(iv) Kiba wanphai na shabar jylla bad ki Highrisks:- Ki Nongshong shnong kiba wan phai na sha bar jylla bad ki highrisk ki ki dei ban pynjngai ialade na kiba ha iing ha sem bad ban shong ha iing ym duna ia ka 7 sngi lynter.

(v) Ki nongpang Covid-19 | (Asymptomatic and Mild symptoms) ba sumar ha ïing:- La ai bor ha ki Dorbar shnong ban pyrkhing ba ki nongpang ki dei ban kohnguh ia ki kyndon Home-lsolation/Home-based Care kumba la bthah da ka Tnad ka Koit ka Khiah. Ki dei ban shong khop ha iing 10 sngi lynter. Lada don ki bym kohnguh ki bor shnong kin pyntip sha ki Incident Commander, Sector Magistrate (BDO), ki Medical and Health Officer bad ki i/c Police Officer jong ki Police Station/Police Outpost ba hajan eh.

• Kaba Ai Tika (Vaccination):- Ngi long kiba donbok ba da ka jingtrei shitom jong ki Saiantis bad ki Doctor ngi ioh kloi ia u dawai injection ban iada na u Covid-19. Nga kynmaw mynshem snem 2020 kiba bun ki nongshongshnong ki la duwai ba U Blei un ai ha ki Saiantis ia ka jingstad ban lap ia u dawai ban iada na Covid-19. Hynrei kaba pyndiaw ia ngi ban iohi ki duna palat kiba wan sha khmat ban shim ia ka Tika Covid-19. Tad haduh ka 4/5/2021 hapoh West Jaintia Hills ha ka rta 45 snem shaneng ki dang don tang 26.4% eiei kiba la shim ia ka Tika. Haba nga ia kren bad kiba ha iing bad ki lok ki jor kiba dei ki doctor ki iathuh baka daw ba ki briew ki sheptieng ban shim ia ka tika ka dei tang na ki khana thamula khlem nongrim lyngba ki social media bad ki doctor jakoid aiu re. la ki jingartatien bad jingbymshai, ki doctor ka Tnad ka Koit ka Khiah ki la dep pynshai lut ba ka Tika Covid-19 ka long kaba bha. Naduh u Chief Minister, ki Cabinet minister, Ki MLA, Ki MDC lem bad ki riew rangbah tang kat kiba nga tip ki la mih sha khmat ban kyntu ia ki paradoh parasnam ban shim ia ka Tika kum U Pa Daloi Puramon Kynjing Daloi Elaka Jowai, | Pastor R.R.Cunville, | Pastor Lyndan Syiem, | Pastor B.R.Sohkhia bad kiwei kiwei kiba ngam lah ban jer kyrteng lut hangne. Kaba nga mut ban iathuh hangne ka long ka Tika Covid-19 ka long kaba bha bad ka lad ban iada wat lada khyndiat ngut ki lah ban ioh pang Covid-19 hadien ba la dep Tika hynrei ka jingktah ka duna bad ka iarap ban lait na ka jingiap. lalade ruh nga la dep ioh tika baroh arsien bad ngam don kano kano ruh ka jingshitom na ka tika. Wat ap haduh kata ka por lada phi kwah tika ruh phin pynlut sngi ban ieng lain lane phin hap siew ruh da ka dor. Kane ka la dep jia ha kiwei pat ki jylla ka ri India. Kumta nga iawer ia phi ki Rangbahshnong, ki Nongialam Niam, ki Nongpyniaid ia ki iew ki hat, ki nongkitkam jong ka seng, ki nongkamai kali bad kiwei kiwei ban iarap ban kyntu ia ki nongshong shnong ban shim ia ka Tika Covid-19. Ka Tnad ka Koit ka khiah ka long kaba pynkhreh ban pynbun ia ki jaka ai tika hapoh ka District lada ka don ka jingdawa na phi ki nongshongshnong.

• Ka Jingsumar:- Katkum ka jingai jingmut (advise) ka Tnad ka Kot ka Khiah ki nongpang kiba hap ha ka Category ‘A’ (person confirmed positive who show no symptoms/ asymptomatic) bad ki Category ‘B’ (persons with mild symptoms) ka jingsumar jong ki kan long ha ki jaka sah ha ïing la jong. Nga iawer ia phi ki Rangbah shnong bad ki Community Covid Management Committee (CCMC) ban ai ia ka jingiatreilang jong phi ia ki Incident Commander, ki Sector Magistrate, ki Nodal Officer, ki Medical and Health Officer bad ki nongtrei ka Tnad ka koit ka khiah ba kin ai ka jingsumar ia ki nongpang ha iing katkum ki kyndon ba la buh da ka sorkar. Lada don ki nongpang ne kiba ha iing ha sem  ki bym kohnguh ia ka jingpyniaid jong ki CCMC sngewbha pyntip sha ki i/c Police Officer jong ki Police Station/Police Outpost bad ki Sector Magistrate/BDO jong ki shnong jong phi.

Na ka bynta ki nongpang kiba dei ki Category ‘C’ (persons needing oxygen support) bad ki Category ‘D’ (persons having severe symptoms needing critical care and ventilator support) dei ban sumar ha ki hospital. Ka sorkar ka la pynkhreh ia kine ki jaka sumar bad ka la don ruh ka jingthmu ban pynbun shuh shuh ia ki jingthiah ha ki hospital. Kane ka dei ka jingsngewkhia ha ki jingmut jingpyrkhat jong nga ban khot ia ka jingiatreilang khnang ban pynduna ia ki nongpang kiba ha ka Category ‘C’ bad ‘D’. Nga sngewthuh bad iohi ba lada uwei pa uwei bad kawei pa kawei ki nongshongshnong kim sumar bad syndong ialade, wat lada pynbun ia ki jingthiah haki hospital kan poi ka por ba wat ia kine ki nongpang ruh lah ban ym don jaka ia ki ha ki hospital. Pynphriang ia kane ka khubor ha ki shnong ki thaw jong phi khnang ba ym don ka jingbabe hadien habud.

• Ka Thup lum Jingtip:- (Common source of information) – Bunsien ngi shem ba ki briew ki kloi ban pdiang ia ki khubor hamsaia aiu re bad kim peit ia ki jingtip bashisha ba la pynmih na ka Tnad ka Koit ka Khiah. Kane ka wanrah ia ka jingartatien ha ki paitbah. Na ka liang ka Tnad ka Koit ka Khiah ki la ialeh shitom ban buh thup ia ki jingtip ba iadei bad ki jaka ai jingsumar, jaka ai tika, jaka ban leit test bad kiwei kiwei ki jingpynshai ba donkam lyngba u number 14410 bad nhmmeghalaya.nic.in Nga kyntu ia phi ban peit na ka por sha ka por ia ki jingtip bathikna na kane ka thup lum jingtip jong ka Tnad ka Koit ka Khiah.

Ngan pynkut da kaba ban jur ban iatrei lang bad ka sorkar ba baroh ki nongshnong ki dukan ban deng mask, ban shim ia ka tika Covid-19 bad lada kam dei kaba kyrkieh bad kaba donkam eh ban ym mih na ki ing ki sem bad ki shnong ki thaw ba phi shong tad haduh ba la don biang ka jingshngain.

Ngam duh jingkyrmen da jingiatrei lang jong phi ryngkat bad ki jingialam jong U Blei ngin jop ia ka khlam Covid-19.

Khublei shibun, Shihajar ngooh

Garod LSN Dykes, IAS
Deputy Commissioner
West Jaintia Hills District