Ka shnong kaba khring iaki nongwan jngoh kai, ka surok kum ka surok kulai

Syllad | The Rising MeghalayaOctober 6, 2020

Ka dei ka shnong kaba khring bha iaki nongwan jngohkai pyrthei, pynban ka surok ban poi sha kane ka shnong ka long kum ka surok kulai kaba dap da ki thliew ki syar bad ka pung ki umktieh ha shilynter ka surok.

Kane ka surok ka dei ka surok ban leit sha ka shnong Shnongpdeng, Amlarem Sub Division, West Jaintia Hills ka shnong kaba la im jakpoh na ka kam shangkai suwari, phewse kane ka sorkar MDA kaba heh tyngam ban kyntiew iaka kam ‘Tourism’ kala leh lyndet ia kane ka shnong bad wat ka surok kaba la dep mang ban shna kala sahteng.

Ia kane ka surok kaba pyniasoh na Dawki Amlarem Jowai Road ka jngai tang 3 KM bad la bei pisa ban shna na ka skim PMGSY.

Ka Khasi Students’ Union (KSU) Shnongpdeng Unit kala pynpaw ka jingbynniaw halor ka jingsahteng ka jingtrei iaka surok kaba pynsiasoh iaka shnong Darrang bad Shnongpdeng.

“Haduh mynta ym shym ladon kano kano ka jingpynkhreh ban shna ne siang rong noh la shu wan buh tang ka signboard PMGSY harud surok,” la ong Kindly Khyriem president KSU Shnongpdeng Unit bad bynrap ba kane ka surok katba nangmih ki sngi kala jot bad dap da ki thliew ki syar bad ka ktieh haki jaka ba lang um.

Ka KSU kala kyntu iaka tnad PWD ban bthah noh ia u kontrak ba dei ban trei ban sdang noh ka kam khnang ba ki paidbah sha kane ka thain kin suk khamtam kito kiba pang ba shitom kin poi kloi sha ki jaka ai jingsumar.

La kyntu ruh ia u Contractor ba ioh ban trei ia kane ka surok ruh ba u dei ban wan trei noh ne phah noh ia ki nongtrei ban sdang iaka jingtrei ha kum kane ka por ba dang duna ki kali motor bad nongwan jngohkai ba wan ba rung shapoh ka shnong.