Ka shnong Nangbah kam kad arliang pynksan dorbar shnong iaka rai kyrshan kyrtong MLA na 3 Raliang

Syllad | The Rising MeghalayaDecember 21, 2022

Ka 3 Raliang Constituency kan sakhi iaka jingiakhun elekshon MLA kaba saw ngut ki kyrtong haduh mynta katkum bala bna u paidbah.

Kane ka constituency ka dei kaba long MLA da u ma Coming One Ymbon kyrtong NPP, katba ka UDP kala pynbna paidbah da u J Treilang Suchiang. Baroh ar ngut kine ki kyrtong ki dei na Shangpung.

Katba na Nangbah ka shnong kaba ju ioh syiem ne MLA hynrei naduh bala phiah iaka na ka Nangbah Wahiajer kala hap noh sha ka 3 Raliang Constituency bad kam ju ioh MLA shuh. Ka dorbar shnong Nangbah haka jingialang kaba long haka 19 tarik Naiwieng 2022 kala rai ban kyrshan ia u ma Lakhon Biam u MDC ba mynta, hynrei ka jingmihshakhmat u MDC barim ka Nangbah ban ialeh iaka elekshon kala pynlong ia kane ka thain ba don haduh saw ngut ki kyrtong haduh mynta.

Une u MDC barim u dei u Shemhok Garod uba la pyniasoh noh sha ka People’s Democratic Front (PDF). U nogialam ka PDF Bah Banteidor Lyngdoh  ula wan hiar sha Nangbah haka sngi ba Ar ban pynskhem bad pdiang ia u Shemhok sha ka iing ka sem ka PDF.

Ka khubor kaba iohlum kane ka constituency, kiwei kiwei ki seng sain hima ruh ki dang ap iaka por ban pynbna iaki kyrtong sha ka election MLA 2023.

Ka Dorbar Shnong Nangbah haba kren bad ki nongthoh khubor haba pynshai iaka rai jong ka, u waheh shnong Ma Tonroy Iongwai ula ong ba dorbar shnong Nangbah kam ju leh donbor ne thombor iano iano.

Ka jingialang haka 19 tarik Naiwieng 2022 da kawei ka sur kala rai bad kyrshan ia u ma Lakhon Biam bad ka jingkynnoh pait arliang ka shnong Nangbah kalong kaba bakla bad khlem nongrim.

U Ma Tonroy ula ong ba ka dorbar shnong man ka por ka pynlong iaka jingialang bad pynneh iaka shongsuk shongsain bad ban iakren iaki kam pynroi ka shnong bad kam ju leh donbor ne iuhroit iaka hok u nongshong shnong. Ula ong ba ka dorbar shnong ka kyrpad ia baroh ki nongshong shnong bad ki paidbah ba kim dei ban shah pynthame ha ki bor kiba na bar ka shnong bad ban kyntait ia kino kino ki khubor kiba kynnoh kynta iaka shnong ka thaw.

Ka shnong kala kren shai ba kino kino kiba thmu ban pynlong jingialang hapoh u pud u ang kashnong ki dei ban ioh jingbit na ka bor shnong.