Ka shong ha ki paidbah ka EJH ban rai la ka jingwanrah lynti rel kan aijingmyntoi ne em: Shylla

Syllad | The Rising MeghalayaNovember 20, 2024

U Nongialam ka UDP uba dei ruh u Myntri Sorkar u bah Kyrmen Shylla ha ka 20 tarik u Naiwieng u la ong ba ka shong ha ki paidbah ka East Jaintia Hills ba kin rai la ka jingwanrah ia ka lynti rel kan wanrah jingmyntoi ne em ia ki.

Haba kren sha ki lad pathai khubor, u Bah Kyrmen u la ong, “Namar ka jingkhim jong ka por kumta ruh ym shym la lah satia ban pynlong ia ka jingialang paidbah ba la thmu na ka bynta ban shim ia ki jingai jingmut bad ki jingpynsngew bapher bapher halor ka jingtyrwa ban wanrah ia ka lynti rel.

“Ia kane ka jingialang ym shym la lah ban pynlong tang halor ka jingkwah ka jong nga hynrei ka dei ban long ka jingkwah bad ka jingangnud jong ki paidbah. Halor kane ngi hap ban sdang da ka jingiasyllok bad ki kynhun bapher bapher, hynrei mynta kam pat dei ka por namar kiba bun kim pat shym la lait por. Hynrei ynda ka por ka la biang ngin sa khot ia ka jingialang halor kane ka phang,” u la ong.

Haba kylli, une u Myntri u la ong ba kam don satia ka jingartatien ba ka roi ka par ka wan ryngkat bad ki jingmyntoi bad kumjuh ki jingduh jingmyntoi.

“Hynrei ngi hap ban peit ia kaei kaba kham iohnong la ka long da kaba wanrah ne ban ym wanrah ia ka. Lada ka dei kaba iohnong bad ka aikam aijam ia ki briew, kane ka shong ha ki paidbah ban rai. Kam pher satia lada ka iohnong katno katno ruh lada ki paidbah kim pdiang, ngim dei ban pyniaid shakhmat hynrei lada ki paidbah ki ong ba ngi dei ban iaid shakhmat bad lada ka ai jingmyntoi, kumta ruh ka don jingmut ban ia pynlut ia ka por bad shim ia ki sienjam halor kane ka bynta” ula ong.