Ka shong satang ha ka Sorkar Pdeng ban rai pyntreikam ia ka ILP bad ithuh ia ka ktien Khasi Garo: CM

Syllad | The Rising MeghalayaFebruary 26, 2025

U Myntri Rangbah ka Jylla u Conrad K Sangma ha ka 26 tarik Rymphang u la ong ba ka shong satang ha ka Sorkar Pdeng ban ai ia ka rai ban pyntreikam ia ka Inner Line Permit (ILP) bad ban pynrung ia ka ktien Khasi bad Garo ha ka khyrnit kaba phra jong ka Riti Synshar jong ka Ri.

“Kum ka sorkar, ngi la mynjur ia ka resolution halor kine ki artylli ki mat. Kine ki mat ki dei kiba la don ha ki kti jong ka Sorkar India. Ka sorkar jylla ka don tang khyndiat eh ka sienjam kaba ka lah ban shim kaba long ban mynjur ia ka resolution ha ka kyrdan ka jong ngi ban kyrpad ia ka Sorkar India ba kan pynrung ia ka ktien Khasi Garo ha ka khyrnit ba phra jong ka Riti Synshar jong ka Ri bad ban pyntreikam ia ka ILP ha ka Jylla…kane ka pyni ia ka jingshim khia na ka liang ka jong ngi ban pyniaid shakhmat ia kane ka kam,” ong u Conrad haba kren sha ki lad pathai khubor.

U Myntri Rangbah u la ban jur ruh halor ka jingdonkam jong baroh ban ia pyrshang radbah ban pynbor ia ka Sorkar Pdeng ba kan shim rai noh kham kloi ha kaba iadei bad kine ki artylli ki mat.

“Hadien kata, mynta ngi hap ban iatreilang ryngkat ryngkat bad ka Sorkar India. Baroh na ngi  na ki seng sain pyrthei bapher bapher, la ki dei na ki kynhun sengbhalang ne ki dkhot ka Parliament bad sorkar Jylla, baroh  kin hap ban shim ia la ka jong ka bynta, bad nga thikna ba baroh ki la shim ia la ki jong ki bynta, hynrei ka dei ka jingkitkhlieh ha baroh ki kyrdan bad nga thikna ba ki  MP bathymmai hapoh Lok Sabha ruh kin shim lang ia ka bynta ban banbor ia kane ka jingdawa bad ban iakynduh ia ki Myntri ba dei khmih, kata la ka dei ia u Myntri kam Pohiing ne u Myntri Rangbahduh ka Ri,” u la ong.

U Conrad u la ong ruh, “Ka donkam ia ka jingpyrshang lang jong baroh bad nga kyrmen ba ngin lah ban pyniaid shakhmat ia kane ka kam. Na ka liang ka sorkar ngi la bteng ban buddien halor kane ka bynta bad ban banbor na ka liang ka jong ngi ia ka Sorkar Pdeng ban pyntreikam noh ia ka ILP bad ban pynrung ia ka ktien ha ka khyrnit ba phra jong ka Riti Synshar Ri.”