Ka shuki donbor bad T.1 lak tulop shi bnai kam khring ïa ki briew bala nang la stad

Syllad | The Rising MeghalayaFebruary 6, 2019

JOWAI: Haduh ka sngi kaba lai jong ka jingthep jinglong kyrtong ne nomination na bynta ban ïakhun ïa ka elekshon sha ka ïing dorbar thawain jong ka Jaiñtia Hills Autonomous District Council (JHADC) tang shiphew ngut kiba dang thep kyrteng na bynta ki 29 tylli ki shuki ba thylli.

Katkum ka jingwad jingtip da u Syllad, na kitei ki shiphew ngut, u wei na ki dei uba la pyndep ia ka jingpule diploma in automobile katba ki khyndai ngut kiwei pat de kiba dang pyndep tang ia ka jingpule hapoh Klass-XII.

Haduh mynta lah ban ong ba ki samla bym don kam bym don jam kiba la pass ia ki kyrdan BA, B.Com, BSC ne ki Master degree kim wan shakhmat ban ïakhun ia ka elekshon.

Haba mih ki jingpynbna lait kam lait jam ha DSC ne MPSC tang na bynta kawei ka post kaba ioh tulop  hapoh 30000 ruh da ki spah ne hajar ngut ki samla ki wan shakhmat ban thep kam haba kin hap ban ialeh ia ki eskamin bapher bapher ban ioh ia ka kam.

Na bynta ban iakhun ia ka elekshon MDC, u kyrtong u hap ban thep security deposit kaba 5000 tyngka bad ka tulop kaba ap ïa ki lada ki jop ia ka elekshon ka long shi lak shiphew hajar lada ki long tang MDC katkum ka tulop kaba thymmai bala mynjur u Lat ka Jylla. Lada ki long CEM ki ïoh haduh T. 1,60 lakh katba lada ki long EM ne deputy Chairman kin ïoh kumba T.1.44 lakh bad lada long Chairman T 1,55 lak bad Deputy CEM pat 1,54 lak.

Ki nongpeit pyrman ïa ki kam sain hima sima ki ong ba ka jingbym rung jong ki samla bala nang la stad sha ka lympung politik ka long kaei kaei kaba duh jingkyrmen ia ka lawei jong ka Ri bad ka jaidbynriew bad ka daw ka lah ban long ba kim don pisa ban iakhun eleshon bad ban thied ia ki vote ban jop ia ka eleshon.

Ka jingthep  nomination kan kut ha ka 8 tarik mynta u Bnai te kyrmen ba ha kine ki lai sngi kin sa mih ki briew ne samla bala nang la stad ban ïakhun ïa ka eleshon MDC, bynrap ki nongpeit pyrman.

Featured Image Sources: Internet