Ka sien kaba ar yn iakynduh ka Chutwakhu bad ka Mooknor Thadmuthlong haka final football ka WJDSA

Syllad | The Rising MeghalayaNovember 12, 2024

Kan long ka sien kaba ar iaka Chutwakhu bad ka Mooknor Thadmuthlong kin iakynduh biang haka final football kaba pyniaid da ka West Jaintia District Football Association (WJDSA).

Kane kala wan long hadien ba ka Mooknor kala jop iaka semifinal kaba ar jong ka kyrdan 1st Division Football Tournament pyrshah iaka Sohmynting da 3-0 haka jingialehkai kaba long haka 12 tarik Naiwieng ha Kiang Nangbah Stadium.

Ka sien ka nyngkong ba kine ki kynhun kila iakynduh ka long haka final 2nd Division mynshem snem ha kaba Chutwakhu kala jop da 1-0 bad rah iaka nam lahduh bad baroh ar kynhun kila kiew sha ka 1st Division. Mynta ka kynti ruh kine ki ar kynhun kila long kiba pynkhreh ban iaknieh iaka nam lahduh bad haka aiom ban wan kin ialehkai noh haka Super Division.

Haba phai sha ka jingialehkai semifinal ba ar, ka jingiakhun kala long kaba shongshit bha ha kaba u Sunidabiang Ymbon ka Mooknor Thadmuthlong ula ioh pdiang iaka red card na ki ar tylli ki foul haka minit kaba 20 bad 56 hadien ka jingiatynjuh bad ki nongialehkai ka Sohmynting.

Shuwa kane ka Mooknor Thadmuthlong kala ioh thep shikol lyngba u Iohi Dhar (42) haka kylla step.

Wat la ka Mooknor Thadmuthlong kala hap ban ialehkai tang 10 ngut, kala ban pynban sa ar kol shuwa ban kut ka por iakhun. Kane kala wan lyngba u Iohi Dhar uba la thep kol kaba ar jong u haka haka minit kaba 90+2 bad u Manhok Suchiang 84.

Kumta da kane ka jingjop ka Mooknor Thadmuthlong iaka Sohmynting kan pynkhreh ban mih madan ban iakhun pyrshah iaka Chutwakhu haka 16 tarik Naiwieng haka por 1: 30 PM ban iaknieh nam lahduh.

Haba phai sha ka jingialehkai Super Division ka Mukhla Raij kala jop da 4-1 pyrshah iaka Sailung Ialong kabym pat ioh khur namjop wat tang shisien ha kane ka aiom.

Ia kine ki saw kol ka Mukhla Raij la thep da u Rikamlang Sumer (23), Chandame Suna (51, 55) bad u Tedyson Bang (60), katba shikol na ka Sailung la thep da u Masan War (70).

Ka jingialehkai haka 13 tarik Naiwieng kan long hapdeng ka Ladthadlaboh pyrshah iaka 7 Wasa haka por 2 baje.