Ka Sixth Schedule kam lah ban iada na ka jingbuhai shnong ki bar ri ong u Winning

Syllad | The Rising MeghalayaOctober 22, 2020

“Ka Khyrnit ba hynriew ne ka Sixth Schedule kam lah ban iada ia ngi na ka jingwan buhai shnong ki bar jylla bar ri ha kane ka thain jong ngi, hynrei ka Jaintia Hills Autonomous District Council (JHADC) Trading by Non Tribals Act and Rule ka lah ban iada ban iarap ia ngi ban khanglad iaka jingwan buhai shnong ki bar jylla bad bar ri,” la ong u ma Winning Garland Sungoh, Executive Member incharge Trading by Non Tribal jong ka JHADC.

U Ma Winning ula ong “Ngi donbok ba ka don ka para 10 jong ka khyrnit ba hynriew kaba ailad ia ka konsil ban shna iaka aiñ Jaintia Hills Autonomous District Council (JHADC) Trading by Non Tribals Act and Rule ban teh lakam iaka jingwan buhai shnong bad khaii pateng beaiñ ki bar ri bar jylla ha ka thain jong ngi.

“Ka Trading by Non Tribals Act ka ai bor iaka JHADC ban khanglad ia kino kino ki briew kiba nabar jylla bad bar ri kiba khaii pateng beaiñ bad ban pynshitom katkum ka aiñ lada kim lah ban pynshisha da ki kot ki sla. Bad ban pyntreikam ia kane ka aiñ ka donkam ia ki nongialam shnong ki nongshong shnong ban iatreilang bad ka konsil ban lah ban khanglad iaka jingwan trei bylla, wan sengkam bad khaii pateng ki briew kiba na bar ri bar jylla,” la ong u ma Winning uba long ruh u MDC ka Mowkaiaw haba kren bad ki nongthoh khubor haka jingkhynra kot sla ba kynthup iaka Trading License bad ka Employee Service License iaki bar jylla ha ka shnong Mihmyntdu, West Jaintia Hills District.

Ula ong shuh shuh ka sorkarpdeng kala mynjur ban pyntreikam iaka Citizenship Amendment Act (CAA) 2019 bad kane kala wanrah jingsyier ia kiba bun ioh kan plie lad ban wan buhai shnong ki briew kiba na bar ri. “Lada pyllait iaka Jylla Meghalaya na ka jingtreikam ka CAA ruh ka Sixth Schedule hi kam don ki ain ki kyndon ban khanglad iaki jingtreikam ki aiñ sorkar pdeng kumjuh ki sorkar jylla bad ka ain konsil kan iap, hynrei ka Trading by Non Tribal Act kan iarap ia ngi bad ka donkam ia ngi baroh ki nongshong shnong ban tynrong halade iaka jinghkitkhlieh ban tehlakam iaka jingwan buhai shnong beaiñ ki bar jylla kiba wan haka dur ban khaii pateng bad trei bylla beaiñ,” la ong u ma Winning.

Ha kane ka jingkhynra kot sla ka JHADC lyngba ka tnad Taxation tang ha Mihmyntdu mynta ka sngi kila lap haduh 20 tylli ki dukan naduh ki kharkhna shna kali, ki dukan kim don trading license bad 31 ngut ki bar jylla kim don iaki labour license kumjuh ka JHADC Employee service license.

U MDC ula ong ba ia kane ka jingkhynra la pynlong da ka jingiatreilang ka bor shnong bad ia kane ka jingkhynra kot sla kin bteng biang ha kine ki khyndiat sngi sha kiwei kiwei ki jaka.