Ka sngi ba lai jong ka Behdieñkhlam: La rah lut iaki diengkhlam kynthup iaka Symbood Khnong & Khnong Blai na Iawmusiang

Syllad | The Rising MeghalayaJuly 8, 2023

Da ki hajar ngut ki khun Niamtre jong ka Seinraij Jowai haka sngi Saitjain, kila ïa mih paidbah ban sakhi ïaka jingrah Khnong Blai ban leit buh ïaka sha ka jaka kyntang ha Pohsawiar bad buh pat ha madan Moosyiem ha Chilliangraij.

Ka lehniam Behdienklam kala poi sha ka sngi kaba lai bad lashai ka sngi ka dei ka sngi kaba saw bad yn pynkut iaka ha pung kyntang Aitnar.

Ka jingleh lehniam bapher bapher kala sdang naduh ka por 4 baje mynstep da kaba pynïeng ïaka Dienkhlam ka Bon ha ïung Blai jong ki jait Rangad ha Chilliangraij Jowai.

Ka shnong ka thaw kala shongshit da ka jingsawa ka bom, ka jingriew bhuri (tangmuri) bad chew chew ryngkat ka kynhoi ka risa.

Ki kynthei longkmie bad ki samla kynthei haki khor ki khriam tynrai bad haki riam beit kiba pher kila mih shongshit da ka mynsiem tylli ban sakhi iaka jingrah diengkhlam bad khatduh la rah iaka Khnong Blai, kaban pynhiar ha Aitnar bad ka jingrah iaki dieng khlam da ki Kmai Raij.

Ha kane ka juh ka sngi la pynïeng ruh ïaka Dienkhlam ka Doh bad hadien kane pat ki thliew ïing ka Niamtre ki la pynïeng ïa ki Dienkhlam rit ha la ki iïng ki iïng jong ki.

Ki khon ka Seinraij ki la leit ban shaw ïaka Symbud Khnong ha ka por 9:30 shiteng mynstep na jaka kyntang na Loom Soo Iung ban pynïeng ïa ka ha Khliehshnong ha dong Chilliangraij.

La pyndep ruh ïa ka jingshad ha ki jaka niam kynthup na madan ka Biar Blai, Datlawakor bad ha kiwei kiwei ki jaka niam ha Ïawmusiang.

Ha ryngkat ki bom ki ksing bad ki tangburi, la leit sha Loomsooïung ban leit rah ïa ka Khnong Blai bad leit buh ïaka haka jaka kyntang ha Pohsawiar.

Haba la poi ha Pohsawiar, u Dolloi ka Elaka Jowai Ma Puramon Kynjing ha ryngkat ka nguh ka dem u la aiti ïa u klong ha u Kñi ka kur Nikhla ban pyndep ïa ka niam ka rukom bad hadien ba la pyndep ïa ka niam, la rah ïa ka Khnong Blai sha madan Moosyiem ka ban pyndep pat da u Kñi ka kur Nikhla bad u Pator. U Dolloi ula sneng la kraw ia u khun u hajar ba kim bit ban leh kano kano ka kam kaba pynsngewsih ia u nongbuh nongthaw bad iaki para briew.