Ka Sokar Jylla kala tyrwa ban sangeh shuwa ban pyntreikam ïaka 3-language formula

Syllad | The Rising MeghalayaOctober 4, 2019

JOWAI: U Ma Lahkmen Rymbui, Myntri ka tnad Pule Puthi ka sorkar Jylla ula ong ba ka sorkar jylla kala tyrwa sha ka sorkar pdeng ba kan pynsangeh shuwa ban pyntreikam ïaka ‘3-language formula’, kata ban hikai iaka ktien Hindi salonsar haki skul ha baroh kawei ka Ri.

Katkum ka draft National Education Policy (NEP) 2019 ka kwah ba ha baroh kawei ka ri ban hikai salonsar iaka ktien Hindi ha ki skul kumjuh iaka English bad ka Regional language, hynrei kala wanrah ka jingpyrshah kaba jur ha ka ri, khamtam ki jylla ki bym kren iaka ktien Hindi.

U ma Lahkmen haba kren haka jingialang pynhap pyrda ïaka Jubili Rupa jong ka Jowai District Presbyterian School, Ialong haka sngi Palei, ula ong ba ka sorkar Jylla kala tyrwa sha ka sorkar pdeng ban pyndam shuwa ban pyntreikam ïa kane ka ‘3-language formula’.

Ula ong ba ka sorkar kala ai jngmut ruh sha ka sorkar pdeng ba ïaki skul ba seng daki kynhun balang ka dei ban ai ba kin pynïaid hi ïaki skul, khamtam ha kane ka jylla kaba bun ki skul kidei kiba pyniaid da ki balang bad kila synniang bor bah ban kyntiew ïka pule ka puthi.

Ha kane ka jingpynhap pyrda ïa kane jubili rupa kane ka skul u Ma Lahkmen ula pyllait paidbah ïaka souvenir bad plie paidbah ruh ïaka computer lab jong ka skul.

Kane ka skul ka dei kaba seng naduh u snem 1994 ha nongbah Jowai, da ki san tylli ki Balang kiba kynthup ia ka Balang Jowai, Thadlaboh, Khimusniang, Mulang bad Mihmyntdu.  Ha u snem 2016 la pynkynriah iaka skul sha ka shnong Ialong.