Ka sorkar Assam kala plie paidbah iaka ktem Pulit ha Saba

Syllad | The Rising MeghalayaJune 14, 2021

Hadpeng ka jingwan lynsher ka khlam COVID-19, ka sorkar Assam kala trei borbah ban pyni syndon da ka kam bad haka 12 tarik une u bnai kala plie paidbah iaka ktem pulit Border Outpost jong ka kaba don haka shnong Saba.

Ka bor synshar district jong ka West Jaintia Hills haka 21 tarik u ‘nai Iaiong kala pynsangeh iaka jingshna ktem Pulit ka Assam ha Saba, ka shnong kaba don hajan Mukroh kiba hap ha khappud Meghalaya- Assam.

Shuh shuh haka 23 tarik Iaiong kila don ruh ki dkhot jong ka United Hynniewtrep Movement (UHM) kiba la hiar sha shnong Saba ban jurip iaka police out post kaba la tei ka Assam la kynnoh ba kila shah hiar thma ha u paid Karbi bad shah shoh pynmynsaw haki briew kiba suba jur ba ki dei naka jaidbynriew Karbi. 5 ngut ki dkhot ka UHM kila mynsaw jur.

Buh ktem pulit ka Assam ha Saba, pynsangeh ka bor district West Jaintia Hills

Kane ka kam tei jingtei ha khappud Assam Meghalaya la lap ba kam don satia ka jingburom ia kata ka status quo. Ka Sorkar Meghalaya naduh ka sorkar Congress haduh kane kaba mynta ka Meghalaya Democratic Alliance (MDA) kaba heh tang ka nia ki da burom shisha ia kata ka status quo, katba ka sorkar Assam kala iaid shakhmat ban tei ia ki jingtei ba har rukom ha khappud.

U Rupsing Teron, MLA Boithalangso LAC, West Karbi Anglong haka 12 tarik ula hiar dalade ban plie paidbah ia kane ka ktem Pulit haka jingiadonlang ki dkhot jong jong ka Karbi Anglong Autonomous District Coucil (KAAC) nalor kiwei kiwei ki heh pulit ka Hamren.

Ka Assam kala kam ba kane ka ktem Pulit kaba don ha Saba ka hap hapoh ka Jrikyndeng Police Station.

U Rupsing ula ong ba kane ka ktem pulit kaba dang shu dep shna ka don ha Khatkasla, West Karbi Anglong, Assam-Meghalaya Border. Ula ong ruh haka khubor paidbah jong u ba un wanrah iaka surok, ka solar light bad ban ker iaka kynroh ka BPO hapoh une u snem.

Une u MLA ka Karbi Anglong ula pyni shisha iaka jinglong nongmihkhmat jong u bad um salia ban thom ban leh ia kano kano ka kam naka bynta jong u paid Karbi. Dangshen ruh ula wan jurip iaka jaka ha Khanduli ban shna iaka skul bah bad kane ruh kala wanrah iaka jingpyrshah na u paidbah.

U MLA ka Nartiang u ma Sniawbhalang Dhar, dalade ula hiar sha ka jaka kaba la kynnoh ban shna skul bah ka Assam bad ula ong baka jaka kaba thmu ban shna ka hap hapoh u pud u sam ka jylla.

Haba phai sha u MLA ka Mowkaiaw, u Nujorki Sungoh uba ju long teng u nongialam barim ka Jaintia Students’ Union (JSU) u dang sngapman man halor kane ka jingshna ia katei ka ktem pulit.

Haduh mynta une u MLA wat la u don haka sorkar MDA, hynrei um pat lah pat ban pynbor iaka sorkar jong u ban tuklar halor kane ka jingshna ktem pulit ka Assam ha kine ki jaka khappud kiba bun ki na ki shnong ki hap hapoh ka 4 Mowkaiaw Constituency.

Lada ki nongmihkhmat ka Assam ki lah ban leh ne pyni da ka kam kumba ki kren ba ka Khatkasla, Saba bad Mukroh ka hap hapoh u pud u sam ka jylla Assam, ka jingkylli kalong, hato ka Meghalaya ka dang don hok ban kam ia kine ki jaka.