Ka sorkar Jylla ka donkam haduh 200-300 klur ban thungkam pura ia ki nonghikai SSA: Rakkam

Syllad | The Rising MeghalayaMarch 8, 2024

U Myntri ka Tnat pule puthi ka sorkar Jylla u Rakkam A Sangma ha ka 7 tarik Lber, u la pynpaw ia ka jingbym lah jong ka sorkar ban thungkam pura ia kumba 12,541 ki nonghikai skul SSA.

Haba kren sha ki lad pathai khubor, u Sangma u la ong ba na ka liang ka sorkar ka donkam haduh kumba 200-300 klur ban pyntreikam ia kaba kum kane ka rai.

“Lada ka sorkar ka rai ban thungkam pura kin dawa ia kajuh ka jingsiew ne scale of pay kumba ioh ki nonghikai skul sorkar mynta. Kumta, kan ban khia shibun ia ka jylla ka bym don satia ia ka jingioh lum khajna kaba biang na lade,” u la ong.

Dang shen na ka liang ka Seng ki nonghikai SSA ka MSSASA ka la bteng ban dawa na ka bynta ban pynkha ia ki post thymmai bad ruh ban pynkynriah ia ki 12541 ngut ki nonghikai SSA kiba la don lypa na ka State Implementing Society sha ka State Education department katkum ki kyndon jong ka RTE/SSA.

“Ia mynta hi na ka liang ka sorkar ka la wad ia baroh ki lad ki lynti bad ngin dang ap na ka bynta ka jingioh jingmynjur na ka State education commission bad ngin khmih ruh halor kaei kaba bha tam kaba ngi lah ban leh ban weng ia baroh ki jingeh, kata ym tang ha kaba iadei bad ki nonghikai SSA hynrei ruh na ka bynta ki nonghikai adhov,” ong u Myntri.

U Rakkam u la pynpaw ruh ba ki la don ki jingtyrwa halor ka jingdonkam ban thaw ia ki district cadres. “Ia ki (district cadres) yn khmih khlem da ia ka kano kano ka pay scale increment hynrei kin ioh ia ka jingithuh,” u la ong.

Da kaba pynpaw ba ia ki nonghikai mynta la thung da ki school managing committees (SMCs) bad ym da ka sorkar, u Sangma u la ong, “Ka jingshimti mynta da ka sorkar kan wanrah jingeh shibun namar kim dei kiba la thung da ka sorkar. Lada ka sorkar kan rai ban shimti, kiba bun ki SMC kin ym ailad satia.Kum ka nuksa, ki don shibun bah ki skul ba la pyniaid da ki kynhun Balang bad katto katne ki dei kiba ioh ia ka SSA fund, lada ngin shim rai ban shiti ia kitei ki skul ki SMC kin ym shah satia.”