Ka sorkar jylla ka la shim ia ki sienjam ban khanglad ia ka jingwan rung ki briew kiba na shabar, ong u CM Conrad

Syllad | The Rising MeghalayaDecember 14, 2023

U Myntri Rangbah ka jylla u Conrad K Sangma u la ong ba ka sorkar jylla ka la shim ia baroh ki sienjam ban tehlakam ia ka jingwan rung jong ki briew kiba na shabar, kata katba ka dang bishar bniah biang ia ka Meghalaya Residents, Safety and Security (Amendment) Bill (MRSSAB), 2020.

Haba kren sha ki lad pathai khubor haka 13 tarik Nohprah, u Sangma u la ong, “Ka long ka jingshisha ba ka MRSSAB ka dei kaba thmu bujli ha ka jaka jong ka Inner Line Permit (ILP) ia kaba ngi la tynruh bad mynjur ruh hapoh ka iingdorbar Assembly, bad ia kane ka Bill ym shym la ioh ia ka jingmynjur na u Lat bad la phah sha nongbah Delhi sha ka President na ka bynta ban ai ia ka jingmynjur. Hynrei ka Sorkar India ka la pynphai biang sha ka sorkar jylla na ka bynta ban bishar bniah namar ki katto katne ki kyndon kiba iatyngkhuh bad ki riti synshar ri ne constitution bad ia kaba dang dei ban bishar bniah biang kumno ban iamir jingmut halor kane ka bynta.”

“Da kaba pynshong nongrim halor kane ka jingai jingtip mynta ngi la bishar bniah biang ia ka MRSSAB da kaba iathir ruh bad ki kynhun bapher bapher kiba ia don bynta, kata kynthup ruh ia ki riew shemphang jong ka aiñ bad advocate general bad ngin khmih kumno ngin pyniaid ia kane ka kam. Ka dei ka kam kaba kham shitom namar ki ain ka sorkar pdeng bad ka sorkar jylla ia kiba ngi dei ban khmih bniah hashwa ban shim ia ka rai halor baroh kine ki bynta, hynrei watla katta kane ka kam ka la iaid bteng bad ngin dang iai buddien halor kane,” ong shuh shuh u CM.

Nalor kata u la ong ruh ba ka jingialang iamir jingmut bad ki kynhun kiba iadei bynta halor kane ka phang kan long hadien u snem thymmai.            

Halor ka jingkylli, u Sangma u la ong; “Ka long kaba shisha ba ma mat ka long halor ka jingwan rung jong ki briew kiba na bar, bad halor kane ki la don ruh ki jingkhynra, ki jingpynshitom bad kiba bun kiwei pat ki sienjam ha kiba bun ki bynta. Kumta kam dei satia ba ka sorkar kam shym la leh ei ei, kata la ka long lyngba ki infiltration check gates, ki sienjam ba la shim da ki tnat bapher bapher ban lap ia kine ki briew bad ban pynphai pat ia ki.”

U la ong ruh ba baroh kine ki sienjam ki la treikam ha ki por ki snem kiba la dep, hynrei ki iapher na ka ILP bad ka MRSSA namar ka thong ba kongsan jong ki ka long ban don ia ka rukom treikam ka ban bishar bniah ia iwei pa iwei u briew kiba wan rung sha ka jylla.

“Ka ILP ka donkam ia uwei pat uwei u briew ba kin ioh jingbit na ka bynta ban wan rung sha ka jylla. Kumta ruh ka don ka jingdawa kaba jur da ki trai shnong riewlum kumjuh da ka jingshim rai jong ka iingdorbar kaba ngi la mynjur ba ka long kaba donkam ban pyntreikam ia ka ILP ha ka jylla Meghalaya, bad kumta ruh ngi la kyrpad ia ka sorkar India, hynrei kam pat shym la ai ia kino kino ki dak kiba shai halor kane ka bynta,” ong shuh shuh u CM.

Shuh shuh u la ong ba ka sorkar Meghalaya ka dang iai ap ia ka jingmynjur jong ka Sorkar Pdeng bad ka dang iai bteng ruh ban pynkynmaw ba kan bishar bniah abd ban shim rai haslor ka ILP.