Ka sorkar jylla kam dei ban kyrkieh ban plie ia ki iing dwai, kyntu ka Seng Khasi Kmie

Syllad | The Rising MeghalayaJune 7, 2020

Ka Seng Khasi Kmie, ka kyntu ia ka sorkar jylla ba kan bha ia ka ba kan nym kyrkieh ba phah plie noh ia baroh ki iing dwai ne ki iing mane jong ki jait niam bapher bapher kiba don ha ka jylla.

Ia kane ka jingsngew ka Seng Khasi Kmie,  la pynpaw ia ka da u Rgh PD Nongrum, General Secretary, Seng Khasi Kmie, uba  la leit ban iashim bynta  sha ka jingialang jong ki seng niam kiba ka sorkar jylla ka la lum haka sngi Saitjain, kum shi bynta ban ia phylliew jingmut halor ki rai da ka sorkar kmie, ba naduh ka 8 tarik ka taiew kaban wan, ba la ailad ia ki jaka mane blei ba don ha ka ri ba ki lah ban plie noh, tangba kin hap ban iaid lang ryngkat bad ki kyndon kat kum ba la dep ban pynbna sha ki paidbah.

 “Naka liang ka Seng Khasi Kmie ngi pynpaw ia ka jingsngewnguh ia la u Chief Minister bad ia ka sorkar jylla jylla kaba la trei shitom ha kaban teh lakam ia ka jingsaphriang u khniang jingpang Covid-19.

Ha ka juh ka por ka Seng Khasi Kmie kala pynpaw  ia ka jingsngew lynga bad pisa bad sheptieng namar ba kat kum ka jingong jong ki stad saian ba une u khniang jingpang u dang lah ban wan biang ha ka sien kaba ar ne ka ‘second wave’ ha u bnai Jylliew bad Naitung.

“Nga sngew ba ngi dang dei ba ngin hap ban husiar bha bad wat laka sorkar kmie ka la shah ban plie ia ki iing dwai jong ki niam bapher bapher mynta u bnai Jylliew,” u Rgh PD Nongrum bad bynrap ba na ka liang ka Seng Khasi Kmie, ka sngew ba ym pat dei ban kyrkieh than ban plie ia kine ki iing dwai ki niam bapher, bad lada long kaba lah ban nang pynjlan ia ka jingplie sha duh ba kut u bnai Jylliew.

Ka sorkar hadien ba la kut u bnai Jylliew, ka lah ba kan khot biang sa shisien ia ka jingialang jong ki nongialam niam ban ia pyrkhat biang (review) ia kata ka rai kat kum ka jinglong ka pyrthei mariang ha kita ki por” la pynpaw u Rgh PD Nongrum.