Ka sorkar jylla kan shimkhia ia ki nongkhaii ba shimkabu ia ki mar rep; ong ka Kong Ampareen

Syllad | The Rising MeghalayaJuly 7, 2024

Ka myntri ka tnad rep ka riang ka kong Ampareen Lyngdoh ka la ong ba ka sorkar kan shimkhia ia ki nongthied kiba ju die ia ki mar rep na Meghalaya khlem ka jingtip jong ki nongrep kaba la pynlong ia ka jingdonkam ban buh da ka GI tagging.

Ka la kren ïa kane ha ka jingïalang jong ka Bharat Agri Conclave cum International Buyer-Seller Meet ha nongbah Shillong, kaba la pynlong da ka Agricultural and Processed Food Products Export Development Authority (APEDA) ha ryngkat ka tnad ka rep ka riang ka Sorkar Meghalaya kaba la long ha ka sngi 7 tarik Naitung.

Ka la ong, “Mynta, u shynrai Lakadong u la pawnam ha ka pyrthei. Kaba sngewsih ka long ba ki nongthied ki don ka jinglong ban shim kabu ia ki nongrep kiba shida jong ngi bad die ia ki mar rep khlem ka jingtip jong ki, kaba pynduna ruh ia ka jinglong kyrpang jong u shynrai. Kumta mynta ngi kum ka jylla ngi shimkhia ban peit ia kane ka jingeh bad pynleit jingmut ban buh GI tagging ban pynneh iaka jinglong kyrpang u shynrai ha iew, ngin shim khia iaka jingleh khliehshrieh ki nongkhaii bad ka pyndonkam beaiñ ia ki mar rep jong ngi bad ki tag jong ngi ha ki iew bapher bapher khlem da bud iaki rukom bad ki kyndon kiba biang.”

Ha kawei pat ka liang, haduh 75% na ki nongshong shnong ki dei ki nongrep, ha kaba ki don katto katne ki mar kiba kyrpang bad kiba mih tang haka Meghalaya, kiba la khring ïa ka iaki iew ka pyrthei, khamtam namar ba ka sorkar kala theh pisa sha ki nongrep trai ri kiba dang rep da ka kti bad kiba bteng ban rep khlem da khleh dawai iaki jingthung (organic) ha ka jylla.

Ka Kong Ampareen kala ong, “Ym don jingartatien ba ha ki jhur, ngi dang shaniah haki jhur kiba khleh dawai (inorganic), bad suki suki, ka jylla Meghalaya mynta ka iatreilang bad ki nongrep ban phai sha ka rep khlem khleh dawai ne organic, kaba dei ka rukom rep tynrai ka Jylla. Ngi khmih lynti ban ïatreilang bad ka APEDA.”

Ka Buyer Seller Meet ka long ka sienjam kaba ai lad ia ki nongpynmih bad ki nongshna ne sain iaki mar ban pyni ia ki mar jong ki sha ki nongthied na ka pyrthei bad napoh ri. Ki nongthied na ki 12 tylli ki ri kata, Uganda, Ghana, Indonesia, Greece, Kuwait, Oman, Vietnam, Nepal, Bangladesh, Singapore, Kenya, bad United Arab Emirates ki la ïashim bynta shitrhem bad ïakynduh bad ki nongshalan shabar ri ha ka Bharat Agri Conclave cum International Buyer- Seller meet ha Shillong, Meghalaya.

Palat 41 ngut ki nongshalan mar shabar ri ha kylleng ka ri bad 106 ngut ki FPO/FPC, ki Corporative Societies bad kiwei kiwei ki kynhun pynmih mar na ka jylla ki la iashim bynta. Ha kane ka jingïalang la ïohi ïa ka jingpyni ïa ki jait mar rep kiba bun jait, kiba kynthup ïa ki soh bad ki jhur kiba thymmai kiba la shna da ki organic, ki jingbam kiba la sain, u shynrai Lakadong, ka ngap, ki jingpyniwbih bad kiwei kiwei.

Kane ka jingïalang ka thmu kalong ban pynïasoh ïa ki nongpynmih bad nongshna jingbam ka jylla Meghalaya bad ki nongthied na India bad nabar ruh. Kane ka jingthmu la khmih lynti ba kan pyniar ia ka nongrim jong ka jingshalan mar shabar jong ka thain Shatei Lammihngi, da kaba pynkiew ia ka ioh ka kot jong ki nongrep bad pynsted ia ka jingroi baroh kawei ha ka thain.

Ban pynpaw sha ka pyrthei iaka North East, ka APEDA ha une u snem mang tyngka kan pynlong shuh shuh ia kum kine ki jingialang ha Arunachal Pradesh, Sikkim, Assam bad ha Bodoland Territorial Council (BTC).