Ka Sorkar ka dang bishar bniah ia ki briew kiba shong ba sah ha Lum Survey: Dy.CM

Syllad | The Rising MeghalayaMay 27, 2024

U Symbud Myntri Rangbah ka Jylla uba khmih ia ka Tnat kam pohiing (Police) u Bah Prestone Tynsong u la ong ba na ka liang ka sorkar ka dang bishar bniah ban pynthikna ha kaba iadei bad kito ki briew kiba shong ba sah ha ha Lum Survey bad ba ka ain kan leh ia kaba donkam lada ka lap ia kito kiba shong ba sah beain.

Haba kren sha ki lad pathai khubor haka 27 tarik Jymmang u Bah Tynsong u la ong, “Ka don ka Ain. Ki don beit ki kyndon ba la buh. Ngi ruh ngim kyrshan ban ai jaka shong ia ki. Lada ki dei kiba shong beain, ka ain hi kan leh ia kaba donkam.”

Da kaba pynpaw ba ka sorkar kam shym la shong mynthi ha kaba iadei bad kane ka mat, u Dy.CM u la ong, “Ngi kwah ban leh ei ei halor kane bad ngi kwah ban pynthikna la kine ki briew kiba shong ba sah ha Lum Survey ki dei ne em na India lane ki lah ban ym dei ngim pat lah ban ong ia mynta hi namar ka jingiit bniah halor kane ka dang iaid shakhmat.” 

“Hynrei, watla katta ngin ia peit lashai ha ka jingshong bishar halor kane ka kam, bad hadien lehse phin sa iohi halor kiei ki sienjam ki ban bud ia kiba ka sorkar Jylla kan shim, kata ym tang ka sorkar Jylla hynrei ka sorkar Pdeng ruh hapoh ka jingialam jng u Defence Estate Officer,” u la bynrap.

Nalor kata u Bah Tynsong u pyntip ruh ba u la bthah ia u Deputy Commissioner ka East Khasi Hills u SC Sadhu ba un khot biang ia ka jingialang jong baroh ki kynhun namar kane ka jaka ka dei jong ka Defence Estate Office, Guwahati bad hap hapoh ka jaka jong ka Contonment Board.

Haba pynpaw halor ka jingshah kyndang jong ki iing ki sem ha ki dkhot jong ka Seng HYC, u Bah Tynsong u la ong ba kane ka Seng ka la leit ban kyndang ia kine ki iing ki sem khlem kano kano ka jingiamir jingmut bad ki bor pyniaid district kaba lam sha ka jingpynkhein ia ki kyndon ain ha katei ka sngi.

Shuh shuh haba kylli halor ka jingkem jong ki dkhot ka HYC ia ki nongkhaii bad ki nongdih drok, u Bah Tynsong u la ong ba u la bthah ia u Deputy Commissioner ba un  khot pynlong ruh ia ka jingialang halor kane ka bynta.