Ka sorkar ka dei ban pynshai ïa ki daw ha lyndet ka jingpynjlan ïa ka elekshon MDC

Syllad | The Rising MeghalayaFebruary 4, 2024

U nongaiktien ka BJP u Bah Mariahom Kharkrang, haka sngi Saitjain, u la ong ba ka sorkar ka dei ban don ki daw ba thikna halor ka jingpynjlan ïa ka samoi elekshon jong ka Khasi Hills Autonomous District Council (KHADC) bad Jaintia Hills Autonomous District Council (JHADC) sha ka hynriew bnai.

“Ka sorkar ka dei ban pynpaw shai halor ki daw tynrai bad ki daw ba mih kyrkieh halor ka jingpynjlan ïa ka samoi elekshon jong kine ki artylli ki ADC,” la ong u Kharkrang haba kren bad ki nongthoh khubor.

“Phim lah satia ban pynjlan ïa ka samoi elekshon jong ki council halor ki daw kiba ym shongnia satia. Ki dei ban don ki daw kiba don jingmut. Hynrei ngin ieh ha ka sorkar ban ai ka jingpynshai halor kane ka mat.” la kynthoh u Bah Kharkrang.

Kum ban shu pynkynmaw ka kynhun myntri sorkar ka jylla ha kane ka sngi Thohdieng ka la ai jingmynjur halor ka jingtyrwa ban pynjlan ka samoi treikam jong kine ki artylli ki ADC hadien ba ki delimitation committee ne ki komiti ba khmihthuh halor ka jingphiah pud thymmai ki la pan por shuh ban pyndep ki kam kiba sah halor ka jingphiah ki jaka ha ki konstituensi kiba hap ha kitei ki council.

U Bah Kharkrang u lah kdew ba “lada ka sorkar ka sngew ba ki daw kyrkieh halor ka jingpynjlan ïa kane ka dei na ka jingphiah ïa ki shnong ha ki konstituensi hashuwa ka elekshon, ka sorkar ka hap ban pynpaw shai pat kaei ka daw ba sngew kyrkieh halor ka jingdonkam ka jingphiah pat ïa kine ki shnong”.

U lah kynnoh ruh ba la kham slem la dep ban thaw ïa ki delimitation committee, hynrei kim shym la pyntyllun ïa ki kam. “Shuh buh lada ym shym la lah ban pyndep ïa ka kam hapoh hynriew bnai kaei ka ban jia, hato phin pynjlan biang?” la buh jingkylli u Bah Kharkrang.

Shuh shuh na ka liang une u nongïalam ka BJP ha ka jylla u la ong ba ka daw hi ka dei na ki jingleh buitpoh ha ki kam saiñ hima sima. “Wat ka jingphiah pud thymmai ruh ka dei na ki daw ka kam saiñ hima sima,” ula ong.