Ka Sorkar ka dei ban shim jingkitkhlieh ba sam da ka um dih ka bym shngain sha ki 44 tylli ki shnong: Adelbert

Syllad | The Rising MeghalayaOctober 5, 2023

U MLA ka liang pyrshah  Voice of the People Party (VPP) ka North Shillong, u Bah  Adelbert Nongrum hynne ka sngi Balang u la dawa ba ka sorkar jylla ka dei ban shim ia ka jingkitkhlieh ha kaba iadei bad ka jingsam da ka umbam umdih ka bym shngain sha ki nongshong shnong jong ki 44 tylli ki shnong ha ka nongbah Shillong.

U Bah Adelbert u la ong ruh ba kane ka pynpaw ia ka jingbym don jingkitkhlieh jong ka sorkar kaba donkam ban pynrem jur da baroh.

Ha kajuh ka por u la pyrto ia ka sienjam ba la shim da ka seng FKJGP ban phah test ia ki nuksa jong ka um ba la lum na ki 46 tylli ki i shnong bapher bapher jong ka nongbah Shillog, ha kaba lyngba kane ka sienjam ba la shim da kane ka seng ka kaiphot lyngba ka Tnat Food Testing Laboratory Commissionerate of Food Safety, Pasteur Hills, Shillong ka la shem ba haduh 44 tylli ki shnong ki la pyndonkam da ka um ka bym don jingshngain satia na ka bynta ka koit ka khiah.

U la ong ruh ba kane ka jingshem ka pynpaw ba ka don ka jingdkoh ha ki jingtreikam jong ka tnat ba dei khmih.Nalor kata une u MLA ka VPP u la kynnoh ruh ba katkum ki khubor la lap ruh ba kane ka tnat kam don satia ia u nongkhmih bniah ne chief chemist u ban ai syrnot  ha kaba iadei bad ka jingshngain jong ka umsbam umdih shwa ba kan leit sha ki paidbah kiba pyndonkam ia ka.

Kumta ruh na ka liang u Bah Nongrum u la ong ba lada ka tnat ba dei khmih ka la pulom ban khmih halor kane ka jingeh, ka sorkar ka dei ban shim ia ka jingkitkhlieh.