Ka Sorkar ka dei ban tuklar iaka jingwan pynsangeh tei skul RMSA ha Psiar ong ka KSU

Syllad | The Rising MeghalayaDecember 17, 2020

Ka Khasi Student Union Laskein Circle haka 14 tarik une u bnai kala leit ia kynduh ia u Additional Deputy Commissioner, West Jaintia Hills ban ujor pyrshah halor ka jingwan ki pulit Assam ban pynsangeh iaka jingtei iaka skul RMSA kaba don ha Psiar.

Kane ka jingwan khang ki Pulit Assam na Mokoilum kala jia haka 9 tarik une bnai. Kane ka kynhun Pulit na Assam kaba ialam da u ophisar incharge ka Mokoilum kila pynsangeh iaka jingtei ia katei ka skul bad kila shim kyrteng ruh iaki nongshong shnong kiba ieng haka nongrim ban ong ba ka Psiar ka hap ha Meghalaya.

Ka bor shnong jong ka Psiar kam shym la pyndem ha khmat kitei ki pulit Assam bad kila iai bteng ban tei ia katei ka skul haka sngi kaba bud.

Ha kane ka jingwan pynsangeh ki pulit Assam la sakhi da u waheh shnong ka Psiar u Menita Synnah, Roimon Biam, Sambha Biam secretary skim bylla 100 sngi bad kiwei kiwei ki riew rangbah ka shnong Psiar.

Ka KSU haka dorkhat kaba la ujor da u President ka KSU Laskein Circle Balawan Suchiang kala ong “Ka nud ban pyntikna ba ka Psiar ka dei ka jaka kaba dang hap pura hapoh u pud u sam ka Jylla Meghalaya, hynrei naka daw ka jingailad bad ka jingshahjem ka jong ngi bad ki bor pyniaid District kumta ka Assam kala shlur bad iohlad ban wan tuklar shapoh u pud u sam jong ngi.”

Ka jingtei ia kane skul Rashtriya Madhyamik Shiksha Abhiyan (RMSA kalong na ka bynta ban pynbha iaka pule puthi haka kyrdan secondary haka shnong Psiar bad ki shnong kiba marjan ha khappud. Ka RMSA ka dei kaba la bei pisa da ka Ministry of Human Resource Development, Government of India.

Halor kane ka jingwan pynsangeh ki Pulit Assam iaka jingtei ia kane ka skul,  naka liang ka KSU Laskein Circle ka kyrpad jur ia ki bor Sorkar ba kin tuklar halor katei ka kam mar mar khnang ba kan nym ktah iaka jingthmu ban pyntrei iakatei ka Iingskul.

Kane ka long katkum ka kyrwoh ba la pyllait da u President ka KSU Laskein Circle u samla Balawan Suchiang bad u samla Javeline Shadap Manner Organising Secy KSU Laskein Circle.