Ka Sorkar ka don ka jingangnud ban pynsngewthuh paidbah halor ka juk Meghalayan Age: CM

Syllad | The Rising MeghalayaOctober 18, 2024

U Myntri Rangbah ka Jylla u Conrad K Sangma ha ka 18 tarik u Risaw u la ong ba ka Sorkar Jylla kan sa pyrkhat janai ia ki lad ki lynti na ka bynta ban ialap bad pynsngewthuh paidbah ia ki jingtip shaphang k juk “Meghalayan Age”.

Ia kane u CM u la pynpaw ha ka jingialang iamir jingmut bad ki nongioh jingmyntoi lyngba ka CM – Elevate and FOCUS ha Shillong bad ia kaba la iashim bynta ruh lyngba ka video online na ki District bad ki Block bapher bapher ka Jylla.

Ia kane ka jingthmu la aijingmut da uwei u nongseng kam na ka shnong Mawmluh, East Khasi Hills, uba la ong ba ka juk “Meghalayan Age” ka dei kaba la iakren bha da ki Geologist ha kylleng ki ri ka pyrthei bad kan bha shibun ba ki briew ba kin tip shaphang kane.

Ki 4,200 snem kiba la leit noh ki dei kiba la tip bad ithuh kum ka juk Meghalayan Age, kaba kdew ia ka por kaba kyrpang ha ka histori jong ka pyrthei. Ki nongwad bniah ki la kdew ia ka jingsdang jong kane ka juk sha ka jingtyrkhong kaba shyrkhei kaba la pynjot noh ia ki nongshong shnong kiba la shemphang ha katei ka juk kaba la rim bah.

Na ka liang u CM u la tyrwa ia shibun ki sienjam ban pynsngewthuh paidbah, kynthup ka jingdonkam ban pynmih ia ki documentary film ka ban batai katkum ka jingstad saian ba la shem da ka jingwad bniah halor ki jinglap jinshem lyngba ka mei ramew. Kane ka phlim kan long ruh kum ka atiar ka ban hikai ia ki paidbah shaphang ka jingkongsan ka mei ramew (geology) ka juk Meghalayan Age.

U CM ula pynshai ruh halor ki skhim bapher bapher kum ka CM-Elevate kaba don bynta bad ka ram ba la pyniasoh bad ki bank bapher bapher. Ka CM-Elevate ka ai ia ka grant kaba kot haduh 70% jong ka pisa ban pynlut na ka bynta ka project baroh kawei.

Halor ki jingeh kiba iadei bad ka jingpyniasoh jong ki nongrep bad ki iew ki hat, u CM u la ong ba ka Sorkar ka la don ryngkat lang bad ki nongrep hynrei ki don ki jingeh. “Kum ka sorkar, ngi wanrah lang ia ki nongrep bad sdang ia ki jingiarap ha baroh ki kyrdan, hynrei ki la don ki jingeh kiba ngi la pyrshang ban ialeh pyrshah,” u la bynrap.

Nalor kata u la ong ruh ban iarap ia ki nongrep bad ban kyntiew ia ka rep ka riang na ka liang ka  Sorkar kala wanrah ia shibun ki prokram ba kynthup ia ka jingseng ia ki processing unit ban pynmih ia ki mar bapher bapher na ki lyngba ki mar rep nalor ka jingthmu ban shna ia palat 100 tylli ki iew jong ki nongrep ha ka Jylla.

Halor ka jingai jingmut ban don ia ka “Agriculture Electricity Tariff” na ka bynta ban seng ia ki karkhana pynmih mar lyngba ki mar rep, u CM u la ong ba na ka liang ka sorkar ka la ai ia ka jingiarap lyngba ki skhim bapher bapher, hynrei ia kane ka jingai jingmut yn sa shong bishar bniah.

Ha kane ka prokram u CM ula sam ruh ia ki cheque sha ki nongioh jingmyntoi lyngba ka skhim FOCUS bad CM-Elevate. Ha kane ka sngi la ia don lang ruh ka Myntri ka Tnad ka rep ka riang ka Kong Ampareen Lyngdoh bad Myntri ka Tnad Veterinary & Animal Husbandry u Bah AL.Hek.