Ka Sorkar ka khlem shongthait ban buddien ban ioh pynrung ia ka ktien Khasi bad Garo ha ka Riti Synshar Ri: CM

Syllad | The Rising MeghalayaFebruary 20, 2024

U Myntri Rangbah ka Jylla, u Conrad K Sangma u la pynsngew hapoh ka Iingdorbar thaw ain hynne  ka sngi Nyngkong ba na ka liang ka Sorkar ka dang iai bteng ban buddien khlem shongthait  ioh ban pynrung noh ia ka ktien Khasi bad Garo ha ka khyrnit ba phra jong ka Riti Synshar Ri ne Constitution.

“Ka dei ka kam kaba dang iaid shakhmat bad na ka liang ka jong ngi, ngi dang iai bteng ban buddien ia kane ka kam bad ka sorkar  India,” ong u Sangma haba jubab ia ka jingkylli ba la wanrah da u nongthaw ain liang pyrshah ka VPP na Mawryngkneng, u Bah Heavingstone Kharpran.

U la ong ruh ba ia ka resolution na ka bynta ban kynthup ia ka ktien Khasi bad Garo la mynjur ha u snem 2018.

“Haduh phra tylli ki shithi la dep ban phah sha ka sorkar pdeng na ka bynta ba kan pdiang ia kane ka jingkyrpad,” ong u CM da kaba bynrap ruh ba ka sorkar India ka la dep ban jubab arsien sha ka sorkar jylla, kata da kaba pynpaw ba kam don satia kano kano ka jingbuh kyndon ba kyrpang ha kaba iadei bad ka jingpynrung ia kano kano ka ktien ha ka  khyrnit ba phra jong ka Riti Synshar Ri.

Watla katta u la ong ba kam pat shym la don satia kano kano ka jingpynshai ne jingbatai bniah kiba la wan na ka sorkar India ha kaba iadei bad ki daw halor kane ka jingpynslem ban pynrung ia kine ki artylli ki ktien ha ka khyrnit ba phra ka Riti Synshar Ri.

Da kaba pynpaw ba dei ka sorkar MDA-1 kaba la shim ia ki sienjam kaba khlain ban pass ia ka resolution ha u bnai Nohprah 2018, u CM u la ong, “Kane ka la wan long ha ka por kaba sdang eh ba ka dang shimti ia ka sorkar bad kaba pynpaw ia ka jingkut jingmut kaba skhem halor ka thong ban ioh pynrung ia ka ktien Khasi bad Garo hapoh katei ka khyrnit ba phra.Ngi dang iai bteng ban buddien bad ka sorkar India bad ruh bad u Myntri Kam pohiing u Amit Shah.

U la ong ruh ba ka jingkut jingmut kaba skhem da ka iingdorbar kan pynthikna ba ka Ministry of Home Affairs kan hap ban shim ia ka rai ha kaba iadei bad kane ka phang.

Nalor kata u CM u la ong ruh ba baroh kine ki artylli ki ktien, kata ka ktien Khasi bad Garo ki dei napdeng ka list jong kumba 38 tylli kiwei pat ki jait ktien kiba dang sahteng bad ka MHA. Ia kane u la pynpaw halor ka jingkylli jong u nongmihkhmat ka Congress na Mawhati u Bah Charles Marngar uba la ong la kane ka jingpynslem jong ka MHA ban shim ia ka rai ka lah ban long ba ka sorkar jylla ka la phah ia ka jingtyrwa ban kynthup ia ka ktien Khasi bad Garo ha kajuh ka por.

U Bah Marngar u la pynpaw ba ka sorkar pdeng ha u snem 2003 ka la ai ka jingithuh tang ia ka ktien Bodo, kata wat hadien ba ka sorkar Assam ka la phah ia ka jingtyrwa ban kynthup ia ka ktien Karbi ha kajuh ka por.

“Nga sngewkmen ba ka sorkar ka la phah ia baroh ki artylli ki ktien, kata ka ktien Khasi bad Garo ban ioh ia ka jingithuh. Hynrei, lada ka don ka jingeh ha kaba phah artylli ki jait ktien ha kajuh ka por, kumta ruh ka sorkar ka dei ban bishar bniah biang, hynrei lada kam long kumta ai ba ka sorkar kan bteng ban buddien bad ka sorkar pdeng,” u la ong shuh shuh.