Ka Sorkar ka la pynkhreh ia ki sienjam ban tehlakam halor kino kino ki jingjia namar u Cyclone: Prestone
U Symbud Myntri Rangbah ka Jylla uba khmih ia ka Tnat kam pohiing (Police) u Bah Prestone Tynsong ha ka 27 tarik mynta u bnai u la ong ba ka Sorkar ka la long kaba la pynkhreh pura ban tehlakam ia kino kino ki jingjia kiba lah ban mih namar ka jingther jong u ‘lapbah bad ka jingjur lyer namar u Cyclone Remal.
Haba kren sha ki lad pathai khubor, u Bah Tynsong u la ong, “Ngi la long kiba la pynkhreh pura ban shimkhia lada mih kino kino ki jingjia namar kane ka jinglong jingman ha ka mariang, kata la ka long ha ka liang ka pisa tyngka, ka bor met bor phad bad ha kino kino ki rukom. Ngi la bthah ia baroh ki tnat ba dei khmih, kata la ka long ia ki tnat sorkar, ki kynhun treimon sngewbha bad kiwei kiwei ki kynhun kiba don bynta haduh ki shnong ki thaw ba kin ai ka jingiatreilang bad ki bor sorkar.”
![](https://www.syllad.com/wp-content/uploads/2024/09/JIT-Vacancy-823x1024.avif)
U Bah Tynsong u la kyntu ruh ia ki nongshong shnong ba kim dei ban klumar jingmut, “Katkum ka jingbatai lypa la ong ba kane ka lyer Cyclone kan dang bteng haduh ka 28 tarik mynta u bnai…Ngi la bthah ia baroh ki Deputy Commissioner ba ki dei ban long kiba peitngor baroh 24 kynta katba ka jingpynsyier lyngba u Cyclone ka dang bteng.”
“Ha ki katto katne ki district, ngi lah ban sakhi ia ki jingma bad ngi la bthah ia ki bor pyniaid district ba ki dei ban long kiba peitngor bad ba kin long kiba la pynkhreh lypa,” ong u Bah Tynsong.
Katkum ka jingtip ba la ioh u la ong ba ka East Jaintia Hills, West Jaintia Hills, South West Khasi Hills, West Khasi Hills, East Khasi Hills, Eastern West Khasi Hills ki dei ki thain kiba lah ban kham don jingma.
Haba kylli la ka sorkar kan khang khyrdep ne em ia ki skul, u Symbud Myntri Rangbah u la ong, “Ngi la iakren halor kane ka mat. Ngi ieh ha ka jingstad jong ki bor pyniaid district ha ryngkat ka jingiasyllok bad ki SDSEO ba kin shim ia ka rai kaba donkam halor kane ka mat. Ka sorkar kam don ei ei ban ong halor kane, hynrei ka jingbthah ia ki bor pyniaid district ka long ba ki dei ban shim ia ki sienjam bad ia ki rai katkum ka jingsngew donkam ka jong ki.”
Nalor kata u la ong ruh ba na ka liang sorkar kala dep ban shna ia ki nala kiba biang ha baroh arliang jong ki surok kiba don ha Demseiniong bad ha kiwei kiwei ki jaka kiba don ha ka nongbah Shillong kiba ju ngat ha ki jingshlei um ha ka por ba jur slap.
U Bah Tynsong u la pyntip ruh ba ka sorkar ka la dep mang T.20 klur na ka bynta kawei pa kawei ka district ba kin pynbiang mardor ia ki jingdonkam na ka bynta ki jingiarap ba kyrkieh sha ki lanot haba jia ki jingshah pynjulor ha ki bor ka mariang.
Shuh shuh u la ong ruh ba ka Tnat Forest ka don ia ka jingkitkhlieh kaba pura ban ithuh ia ki dieng kiba la tlor bad kiba lah ban khyllem noh.
“Haba kren biang halor ka jylla Meghalaya, ki don bun ki khlaw ki btap kiba hap hapoh ka jingpeit jingkhmih jong ki Syiem, ki Raid bad kumta halor kane ka bynta ruh ngi donkam ban iatai sani bad baroh kiba ia don bynta bad ban khmih bad ban pynkhyllem noh ia kiba kum kine ki dieng kiba buh jingma na ka jingkhyllem,” u la ong shuh shuh.
Leave a Reply