Ka Sorkar ka la pynleit jingmut kham kongsan sha ka Tnad ka Koit ka khiah: CM

Syllad | The Rising MeghalayaJanuary 17, 2025

U Myntri Rangbah ka Jylla u Conrad K Sangma ha ka 16 tarik Kyllalyngkot u la plie paidbah ia ka Rural Health Centre ha Myriaw, Eastern West Khasi Hills District ha ka jingiadonlang u Myntri ka Tnad Sports u Bah Shakliar Warjri bad u MP ka Rajya Sabha u Dr WR Kharlukhi.

Haba kren ha ka jingialang u Myntri Rangbah u la ong ba ka bynta kaba iadei bad ka koit ka khiah ka dei kaba shem jingeh tam ha ka jylla, kata haba kdew halor ki jingkylla ha kaba wanrah ia ki jingtei ia ki jaka sumar ha kine ki 7 snem kiba la dep ban pynlong ia ki jaka sumar ki ban plielad shuh shuh na ka bynta ki paidbah nongshong shnong ha ki thain nongkyndong.

Haba pynpaw halor ka jingkut jingmut jong ka sorkar ban kyntiew bad pynkylla dur ia ka tnad ka koit ka khiah lyngba ka jingmang tyngka kaba heh tam kaba long haduh 9%, bad kaba dei kaba hehduh hapoh ka ri, u la ong ba kane ka pynpaw ia ka jingkut jingmut ba shisha jong ka sorkar.

Ia kane ka Rural Health Centre (RHC) la bei tyngka da ka CMSDF ha ka jingpynlut ba kot T.38.8 lak, katba sa T.38 lak yn sa pyllait. Ka Myriaw RHC ka kdup ia 21 tylli ki shnong bad ia kaba yn pyniaid da ka Dr HG Roberts Hospital, Shillong. Kane ka RHC ka dei kaba saw ban pyniaid da kane ka Hospital hapoh ka Jylla.

Haba ban jur ia ka bor jong ka jingiatreilang, u Myntri Rangbah u la ong ba katba ka sorkar ka dang trei ia la ka kamram, ka jingkyrshan na ki shnong ki thaw bad ki kynhun kum ka Dr. H G Roberts Hospital, Shillong kan nang ai mynsiem ia ka jingiatylli ban lah ban pynpoi ia ki lad jingsumar ha ka jylla baroh kawei.