Ka Sorkar ka la shim khia ban tehlakam ia ka jingkiew dor ki mar ki mata: Ymbon

Syllad | The Rising MeghalayaAugust 30, 2024

U Myntri ba khmih ia ka tnad Food Civil Supplies & Consumer Affairs u Bah Comingone Ymbon haka 29 tarik Nailar, u la ong ba watla ka jingkiew dor jong ki mar ki mata ka dei kaba la wan long lyngba ki daw bapher bapher, hynrei na ka liang ka Tnad ka la trei borbah ha ryngkat ki District, Sub Division bad baroh kiba don bynta ban tehlakam ia kane ka jingkiew dor ha ka Jylla.

Haba jubab ia ka call attention ba la wanrah da u MLA ka VPP u Bah Ardent M Basaiawmoit, u Bah Ymbon u la ong ba ka la don ka jingjurip bniah kaba khah khah halor ki dor ki mur jong ki mar ki mata bad ban pynthikna ba ka jngkiew dor kan ym ktah ia ki nongthied nong pet, khamtam ia kito kiba wan na ki longiing kiba duk ha ka liang ka ioh ka kot.

“Na ka liang ka Tnad ka don ia ka jingkut jingmut ban iada bad khmih ia ka bha ka miat bad ki jingmyntoi jong ki nongthied nongpet da kaba pynthikna halor ka jingioh ia ki mar bam kiba kongsan ha ka dor kaba biang. Lyngba ka jingiai bishar bniah bad ka jingpyntreikam kaba pyrkhing ha ryngkat ka jingiatreilang bad ki bor sorkar Jylla bad ki tnad ka sorkar Pdeng, ngi sngew skhem ba ki sienjam ba la pyntreikam kin iarap ban pynduna na ka jingshah ktah jong ki paidbah lyngba ka jingkiew dor jong ki mar ki mata ha ka Jlla,” u la ong.

Nalor kata u Myntri u la ong ruh ba khnang ban khanglad ia ki kam leh thok kum ka jingset ia ki mar bad ka jingdie beain ne ‘black marketing’, na ka liang ka sorkarJylla ka la pyntreikam ia ka Prevention of Black-marketing of Supplies of Essential Commodities Act 1980, bad ka Essential Commodities Act, 1955.

Kumjuh u Myntri u pyntip ba la pynlong haduh 79 tylli ki jingkhynra ha ka jylla hapoh ki kyndon Essential Commodities Act, 1955 bad Prevention of Black-marketing of Supplies of Essential Commodities Act 1980, ha u snem 2021-22.

“Hynrei kane ka jingkhynra ka la kiew sha ka 107 ha u snem 2022-23 bad sha ka 274 sien ha u 2023-24. Kine ki jingpyrshang ki pyni ia ka jingkut jingmut jong ka sorkar ban khanglad ia ki kam khaii beain bad ban pynthikna ba ki paidbah kin ioh ia baroh ki mar bam ba kongsan ha ka dor kaba biang,” bynrap u Myntri.