Ka Sorkar ka pyrshang katba lah ban weng ia ki jingeh jong ki nonghikai; ong u Myntri

Syllad | The Rising MeghalayaNovember 20, 2024

U Myntri ka Tnad Pule Puthi u Rakkam A Sangma ha ka 19 tarik Naiwieng u la ong ba na ka liang ka Sorkar ka la pyrshang katba lah ban shim ia ki sienjam ban leh ei ei halor ki jingeh jong ki nonghikai bapher bapher kaba kynthup ia ki nonghikai SSA ha ka Jylla.

“Ka kam ka dei kaba shim por..hynrei ka Sorkar ka la pyrshang ia baroh ki lad ki lynti ban leh ei ei na ka bynta ki nonghikai bapher bapher namar ki dei ki briew ki jong ngi bad ki dei kiba ai jingshakri ia ka Jylla,” ong u Myntri haba kren sha ki lad pathai khubor.

Nalor kata u la pynpaw ruh halor ka jingdonkam ia baroh ki kynhun kynthup ia ki nonghikai ba kin iatreilang bad ka sorkar.

Ha ka 18 tarik u Naiwieng ka Meghalaya SSA Schools’ Association (MSSASA) ka la tyrwa ia ka jingdonkam ia ka sorkar Jylla ba kan ai ia ka bhah kaba 70% na ka bynta ki nonghikai SSA ha ka jingthung kam nonghikai ha ki kam ba lait jong ki skul bapher bapher ha ka jylla ha ka jingialang ba la khot pynlong da u Commissioner & Secretary uba khmih ia ka Tnad pule puthi, u Vijay Mantri ban iamir jingmut halor ki jingeh jong ki nonghikai SSA ha ka Jylla.

Halor kane, u Myntri u la ong ba kane ka dei ka kam kaba iadei bad ka policy bad na ka liang ka Sorkar ka la dep ban mynjur na ka bynta ban pynjynsur ia ka rta thep kam ia ki nonghikai SSA sha ka 45 snem rta khnang ba kin lah ban aplai ia ki kam hikai ha ki skul sorkar.