Ka sorkar kala dep tyrwa ban siang artificial turf ha madan First Ground ka Shillong Sports Assoc: Banteidor

Syllad | The Rising MeghalayaMay 28, 2022

U Bah Banteidor Lyngdoh Myntri ba dei khmih ia ka tnat sports & youth affairs ka sorkar jylla, haka sngi Thohdieng u la ong ba naduh kaba sdang, na ka liang ka tnat kaba u dei khmih jong ka sorkar jylla, ki la dep ban buh ia ka jingtyrwa sha ki nongkitkam ka Shillong Sports Association (SSA), ba ka sorkar jylla, ka long kaba la pynkhreh ne kaba kloi ban pynsiang da u artificial turf ia ka madan first ground.

Ha kane ka jingiakren nalor ka jingtyrwa ha kaba sdang, u bah Banteidor u la ong ruh ba ha kito ki por, na ka liang ki nongkitkam ka SSA ki la kyntait ia kane bad ki kwah beit ban thung da u phlang ba shisha ne u natural turf, pynban hadien ba ki la sngewthuh ba kam long, ki la rai ban siang noh da u artificial turf.

Kum u riew ba ieit bad ba dei teng ruh u nongialehkai ialade, u bah Banteidor u la ong ba ha ka jylla hi kan long kaba eh bha ban ong ban shna ia ki madan phlang ba shisha ne ki natural turf, katno tam lei lei lada pynlong ia ki lympung ialehkai kumka Shillong Premier League, ha kaba prokram ialehkai hi ka la long lypa kaba bun bad kaba hap ruh ban iai bteng ban pynialehkai khlieh la ka sngi, da kumta ki natural turf da lei lei kin nym shan slem.

Pynban khlem ka jingpynduh mynsiem pat iano iano ruh, u bah Banteidor u la ai pat ia ka khubor lam sngewtynnad ba na ka liang ka jong u kum u Myntri u la shim khia biang sa shisien na ka liang ka jong u da kaba ula dep ban mang biang ia ka kam ban khreh siang noh da u artificial turf, ha kaba u la ong ba ka kam ruh ka la sdang  ba kan jam shakhmat bad u la ong artad ba na ka liang ka jong u un da trei shitom ryngkat bad ka tnat ban pynioh noh da u artificial turf.

Haba jubab biang pat ia ka jingkylli bynrap hato la ka kylla kaba ar ne ka second leg ka SPL, la lah pat ne em ban siang pyndep ia kane ka madan, u bah Banteidor, u la ong ba lada ki kam ki jam ki iaid beit shakhmat kumba ki iaid mynta, khlem pep imat la lah ban ioh pynialehkai noh ha kane ka madan, bad u la ong ruh ba u la kyntu ia u ko9ntrator ba un sdang wat ban khreh wanrah noh ia ki tiar kum u turf, u rubber, u shyiap, namar ma u ruh u da thrang bad sliang ba ka lympung ialehkai Shillong Premier League kan da khie im bad kan da long biang kumba ka la long teng ha ki por ba mynshwa.