Ka sorkar kam shym la bei tyngka na ka bynta ki kam pynroi ha ka Jylla da kaba shim ram: CM

Syllad | The Rising MeghalayaMarch 7, 2024

U Myntri Rangbah ka Jylla u Conrad K Sangma ha ka 6 tarik Lber, u la ong ba ka sorkar kam shym la bei tyngka da kaba shim ram ban pyntrei ia ki kam pynroi ha ka Jylla.

 Haba kren sha ki lad pathai khubor, u Sangma u la pynpaw ruh ka jingbym sngew iahap halor ka jingkynnoh jong ka liang pyrshah ba ka sorkar ka la shim da ka ram na ka bynta ki kam pynroi ha ka jylla.

“Ngam mynjur da lei lei ruh ia kane ka jingkynnoh.Nga la pynshai ia kane ha ka jingkren ha ka Dorbar Mangtyngka ba dang shen, kumta Nga sngew ba ki (liang pyrshah) ki dei ban shong bad ban pynsngap ia ka jubab ka jong Nga.Haba ki rah ia ka mat bad kim pynsngap ia k jubab ka jong nga bad hadien mynta biang hadien ba Nga la jubab ki la rah biang ia kane ka mat, kumta Ngam tip shuh shano ngan jubab ia kane ka jingkylli,” u la ong.

U la ong ruh, “Ka jingioh bhah ka jong ngi na ki khajna ka sorkar pdeng ka la long da ar shah, kata na ka T.4000 klur sha ka T.9000 klur ha kine ki san snem ba ladep. Katba ka khajna ka jong ngi kaba ngi la ioh lum ka la kiew na ka T.1700 klur ha u snem 2018 sha jan kumba T.4700 klur, kata da jan lai shah ha kine ki san snem ba la dep. Kumjuh ka bhah kaba ngi lyngba ki skhim ka sorkar pdeng, ka pisa kaba ngi la ioh lum ka la long jan lai shah lada ngi shim kyllum na baroh ki skhim. Ka Externally Aided Projects (EAP) jong ngi bad ka jingpynlut ka la kiew da san shah haba ianujor bad ki snem kiba la leit noh bad kine ki EAP watla ki dei jong ka World Bank hynrei ka dei kaba la ai subsidy haduh 72% lyngba ka sorkar India. Kumta ngi la siew tang 28% bad kane ruh kam dei satia ka ram. Ngi hap lypa ruh ban siew 28% bad ka GOI ka la ai subsidy bad siew 72%.

Kumta ruh na ka liang u CM u la ong ba lada ki MLA ka liang pyrshah kin jin da la shong hapoh ka iingdorbar bad ban sngap ia ka jubab ka jong u ha katei ka sngi kut jong ka Dorbar Mangtyngka kumta ruh kin ym buh shuh ia kane ka juh ka jingkylli na kawei ka por sha kawei pat.