Ka Sorkar kan hap ban pyrkhat ia ki 200 million ki riewlum lada ym kwah ieh shadien iano iano ha ka roi ka par: NITI Aayog

Syllad | The Rising MeghalayaOctober 12, 2023

U Vice Chairman ka NITI Aayog, u Suman Kumar Bery haka sngi Balang u la ong ba lada ka sorkar ka kwah ban pyntreikam ia ki sienjam ki ban ym ieh iano iano ruh shadien kumta ruh ka dei ban pyrkhat ha kaba iadei bad kumba 200 million ki paid riewlum.

Haba kren sha ki lad pathai khubor ha ka jingleit jurip ia ka ophis ka HIma Mylliem, u Bery u la ong ba u Myntri Rangbahduh ka Ri u Narendra Modi ula pynleit jingmut shibun ha kaba iadei bad ki jingeh bad ki kam jong ki paid riewlum. Ula ong ruh ba ki paid riewlum ki dei shibynta na ki paid nongshong shnong ka Ri India ba kongsan bha hynrei bunsien kim shym la ioh satia ia ki jingkyrshan lyngba ki skhim ka Sorkar pdeng.

“Namar kata ka NITI Aayog hapoh ka Ri baroh kawei ym tang ha ki Jylla, kumba kala shimkhia bha ia ki mat kiba iadei bad ki paid riewlum namar lada phi kwah ia ki buit treikam kiba paka bha ha ka roi ka par ka ban nym ieh iano iano ruh shadien, phi tip ba phi hap ban pyrkhat lang ia ki 200 million ngut ki paid riewlum ka Ri, u la ong shuh shuh.

Nalor kata na ka liang u Vice Chairman ka NITI Aayog ula pynpaw ruh ia ka jingangnud ban tip shaphang ka kam bad ka bor jong ka Autonomous District Council (ADC) bad ong “Ngam shym la pynkhreh ialade halor ka mat kaba iadei bad ka jingkyrshan pisa hynrei kane hi ka dei ka kam jong ka Sorkar Jylla ym jong ka Sorkar Pdeng”.

Shuh shuh haba pynpaw ba ha man la ki kyndong kynshot jong ka India ki don ki jingiapher, u Bery ula ong “Ngi kum ka NITI Aayog ngi don hangne na ka bynta ban shakri ia ki Jylla. U Myntri Rangbahduh u ju ong bha bad ngeit ba ka Ri India kan kiew lada ki Jylla ki kiew”.

Ha kajuh ka por ula pyntip ruh ba ka jingwan jong u sha Meghalaya ka dei tang ka jingwan burom ym kaba wan halor kino kino ki mat treikam ne agenda. Hynrei ka dei ka kabu ia nga ban sngewthuh halor ki mat bad ki jingeh kiba kum ka Jylla ka iakynduh, bad dei namar kata nga la wan hangne, u la bynrap shuh shuh.

Ha kane ka jingleit jurip na ka liang u Syiem ka Hima Mylliem ula pdiang sngewbha bad pynkup burom ia une u Vice Chairman ka  NITI Aayog ha ryngkat ka jingiadon lang ki Myntri bad u Chief Executive Member (CEM) ka Khasi Hills Autonomous District Council (KHADC) u Bah Pyniaid Sing Syiem.